𝐓𝐋 𝐍𝐎 𝐅𝐈𝐋𝐈𝐏𝐇𝐈𝐍𝐀 𝐇𝐀𝐌𝐄𝐓𝐈𝐍 𝐏𝐀𝐑𝐒𝐄𝐑𝐈𝐀 𝐈𝐇𝐀 𝐀́𝐑𝐄𝐀 𝐏𝐑𝐎𝐓𝐄𝐒𝐀𝐔𝐍 𝐒𝐈𝐕𝐈𝐋 𝐍𝐎 𝐉𝐄𝐒𝐓𝐀𝐔𝐍 𝐑𝐈𝐒𝐊𝐔 𝐃𝐄𝐙𝐀𝐒𝐓𝐑𝐄 𝐍𝐀𝐓𝐔𝐑𝐀𝐈𝐙

Manila, 24 Setembru 2026 (SRP) — Ministru Interiór, Francisco da Costa Guterres, Ph.D., akompaña husi Embaixador Timor-Leste ba Filipina, Marciano Octavio G. da Silva, no Prezidente Autoridade Protesaun Sivíl, Jesuinho Matos, hamutuk ho delegasaun, hala’o reuniaun bilaterál ho Sub-Sekretáriu ba Jestaun Dezastre husi Ministériu Defeza Filipina, Harold N. Cabreros, iha Manila, Filipinas, iha 15 Setembru 2026.

Reuniaun bilaterál ne’e foka ba diskusaun no troka esperiénsia kona-ba oinsá atu hametin liután kooperasaun entre Timor-Leste no Filipina iha área protesaun sivíl, prevensaun no redusaun risku dezastre, liuliu iha esforsu hametin kapasidade no reziliénsia komunidade sira hasoru dezastre naturál.

Iha enkontru ne’e, parte rua diskute prioridade estratéjika tolu, mak:

Primeiru, fortalesimentu área protesaun sivíl, liuhosi fahe esperiénsia, koñesimentu no kapasidade téknika hodi dezenvolve no hametin sistema protesaun sivíl iha nasaun rua.

Segundu, elevasaun kapasidade setór privadu, liuhosi dezenvolve estratéjia ne’ebé bele aumenta partisipasaun no kapasidade setór privadu atu envolve ho ativu iha prevensaun, preparasaun no resposta ba dezastre, nune’e bele kontribui ba reziliénsia nasional hasoru risku dezastre naturál.

Terseiru, hametin kooperasaun estratéjika ho AHA Centre, liuhosi hafoun no hametin liután ligasaun kooperasaun ho sentru rejionál ne’e, ne’ebé iha papél importante iha koordenasaun asisténsia umanitária no resposta ba dezastre iha rejiaun Ázia Sudeste. Kooperasaun ne’e sei ajuda atu asegura resposta ne’ebé lalais, koordenadu no efisiente liután iha situasaun emerjénsia.

Reuniaun bilaterál ne’e reprezenta pasu importante ida iha esforsu Timor-Leste atu aprende no benefisia husi esperiénsia Filipina, ne’ebé iha esperiénsia signifikativu no sistema dezenvolvidu iha área jestaun risku dezastre naturál.

Kooperasaun ne’e mos reflete kompromisu nasaun rua nian atu kontinua hametin kapasidade institusionál, partilha koñesimentu no dezenvolve mekanizmu resposta ne’ebé efetivu, ho objetivu prinsipál atu fo protesaun ba povu, komunidade no patrimóniu nasional hasoru impaktu dezastre naturál. #Delia. teste