DILI, 19 Novembru 2026 (SRP) – Ministru Interiór, Francisco da Costa Guterres, Ph.D, akompañadu husi Diretór Ezekutivu Servisu Migrasaun, Komisáriu Asistente Jorge Monteiro, no ekipa sira, partisipa iha enkontru aprezentasaun kona-ba Proposta Lei Migrasaun no Azilu, ne'ebé hala'o iha Sala Multi-Média Servisu Migrasaun, ho apoiu tékniku husi Organizasaun Internasionál ba Migrasaun (IOM).
Enkontru ne'e iha objetivu atu Ministru Interiór fó orientasaun no konsiderasaun kona-ba prosesu revizaun Lei Migrasaun no Azilu, inklui aspetu prosedimentál sira, hodi asegura katak proposta lei foun ne'e responde ba nesesidade no realidade atual iha Timor-Leste.
Durante aprezentasaun, Ministru Interiór no ekipa Servisu Migrasaun hato'o sujestaun no rekomendasaun ba ekipa IOM atu kontinua hadi'a no ajusta proposta lei ne'e, tuir situasaun no realidade atual nasaun nian.
Ida-ne'e tanba dispozisaun balu iha Lei Migrasaun no Azilu ne'ebé vigora atualmente la reflete ona realidade atuál, nune'e presiza halo revizaun, inklui hasai ka substitui ho dispozisaun foun ne'ebé apropriadu no responde ba nesesidade atuál.
Proposta Lei Migrasaun no Azilu ne'ebé aprezenta iha enkontru ne'e mak rezultadu husi servisu kolaborasaun entre ekipa téknika Servisu Migrasaun no konsultór IOM durante fulan hirak liubá.
Antes enkontru remata, Ezekutiva rekomenda ba Servisu Migrasaun no IOM atu prepara planu no mekanizmu ba aprezentasaun proposta lei ne'e ba Ministériu no Ajénsia relevante sira, hodi hetan hanoin, komentáriu no rekomendasaun husi parte interesada sira.
Prosesu konsultasaun ne'e sei sai parte importante antes proposta final lei ne’e, sei submete husi Ministru Interiór ba Konsellu Ministrus atu konsidera no aprova, tuir prosedimentu legal ne'ebé vigora.#Buy