DILI, 11 Novembru 2026 (SRPM) – Ministru Interiór, Francisco da Costa Guterres, Ph.D, akompaña Primeiru-Ministru, Kay Rala Xanana Gusmão, simu vizita kortezia husi Xefe Forsa Defeza Reinu Tailándia, Jenerál Ukris Boontanondha, hamutuk ho nia delegasaun, iha Salaun Enkontru Gabinete Fronteira Terrestre no Marítima, Palásiu Governu, kuarta-feira ne’e.
Hafoin enkontru, Jenerál Ukris Boontanondha, hateten katak, parte rua diskute ona atu prepara Memorandu Entendimentu (MoU) ida kona-ba dezenvolvimentu, nu’udar parte husi preparasaun ba komemorasaun aniversáriu dala-25 relasaun diplomátika entre nasaun rua ne’e iha tinan 2027.
Nia salienta katak durante ne’e Tailándia fó ona formasaun kona-ba manutensaun pás ba Timor-Leste, no iha futuru prontu atu konvida Timor-Leste hodi partisipa ativu iha operasaun manutensaun pás sira seluk.
Enkontru ne’e mós aborda kooperasaun iha área asisténsia umanitária no apoiu ba populasaun. Tailándia iha sentru formasaun espesífiku ba asisténsia umanitária ne’ebé organiza treinamentu regularmente kada tinan, no loke odamatan ba sentru sira-ne’e hodi tulun kapasita pesoál timoroan sira.
“Atu implementa kooperasaun ne’e, nasaun rua sei estabelese mekanizmu bilaterál entre forsa armada Tailándia no Força de Defesa de Timor-Leste (F-FDTL), atu koordena no promove atividade sira ne’ebé konkorda ona,” Jenerál Ukris Boontanondha.
Entretantu, parte rua konkorda atu hametin servisu hamutuk entre Tailándia ho Timor-Leste, liuliu iha área defeza, seguransa, asisténsia umanitária, no dezenvolvimentu sustentável.
Partisipa mós iha enkontru ne’e Diretór-Jerál Polítika Defeza Nasionál, Nuno Carvalho dos Santos, no Primeira Sekretária ne’ebé mós hanesan Asistente Reprezentante Permanente ba ESCAP iha Embaixada Repúblika Demokrátika Timor-Leste iha Reinu Tailándia, Merina Úrsula Xareal.
