Manila, 28 Outubru 2026,SRPM- Ministru Interior, Francisco da Costa Guterres, akompana husi Diretor Ezekutivu Servisu Migrasaun, Komisariu Asistente Polisia Jorge Monteiro, Xefi Gabinete Relasaun Internasional Servisu Migrasaun, Inspetor polisia Miguel Gomes, Adidu Migrasaun Ba Filipina, Edegar da Costa Marcos, hala’o mós reuniaun bilateral ho Sekretária-Jerál Adjunta ASEAN, Astanah Abdul Aziz, iha Manila, Filipina.(21/10/2026)
Enkontru bilateral ida-ne’e sai hanesan oportunidade importante atu haforsa diálogu no kooperasaun entre Timor-Leste ho Sekretariadu ASEAN, liuliu iha prosesu preparasaun no implementasaun programa sira ne’ebé bele fó apoiu ba dezenvolvimentu kapasidade institusionál no rekursu umanu iha Timor-Leste.
Iha enkontru ne’e, parte rua diskute kona-ba apoiu potensiál ba Timor-Leste liuhusi dezenvolvimentu programa ho faze oioin, ne’ebé foka ba dezenvolvimentu kapasidade, asisténsia téknika no modernizasaun teknolojia, tuir kuadru kooperasaun, mekanizmu no prioridade ASEAN ne’ebé relevante.
Kooperasaun ida-ne’e iha importánsia boot atu hametin kapasidade instituisaun, hadi’a efisiénsia servisu públiku, no aumenta koñesimentu tékniku hodi responde ba dezafiu rejionál ne’ebé kontinua evolui. Aleinde ne’e, apoiu tékniku no transferénsia koñesimentu bele sai hanesan elementu importante atu fasilita prosesu adaptasaun ba sistema no teknolojia foun, hodi asegura katak Timor-Leste bele partisipa ho efetivu iha mekanizmu kooperasaun rejionál.
Enkontru bilateral ne’e mós reflete kompromisu no determinasaun Governu Timor-Leste atu kontinua hametin relasaun institusionál ho ASEAN, dezenvolve kapasidade nasionál no aproveita oportunidade kooperasaun ne’ebé bele lori benefísiu konkretu ba dezenvolvimentu nasaun.
Nu’udar membru plenu ASEAN, Timor-Leste kontinua buka atu kontribui ho ativu ba esforsu koletivu hodi hametin estabilidade, seguransa no kooperasaun iha rejiaun. Liuhusi parseria ne’ebé forte no sustentavel, Timor-Leste kompromete-an atu partisipa iha konstrusaun futuru ASEAN ne’ebé dame, seguru, reziliente no prósperu ba povu hotu iha rejiaun.
Timor-Leste mos usa oprtunidade ne’e husu ba Secretaria ASEAN atu bele suporto Asistencia teknika ba Servisu Migrasaun ne’ebe sei sai Co-Chair iha Encontro Immigration Traing Committee (ITC) ne’ebe sei realiza iha Dili iha ano 2027. Alende de husu Asistencia teknika, Timor-Leste mos husu ba Secrearia ASEAN atu bele destaka official nain 2 iha Singapore iha 2027 no nain 2 seluk koloka iha Thailandia atu bele apresenta oinsa organiza evento ASEAN iha future, tamba nasaun 2 nee maka sei sai uma nain encontro nivel alto ASEAN iha 2027 no 2028.#buy
