MI PARTILA ESFORSU TIMOR-LESTE IHA KOMBATE KRIME TRANSNASIONÁL


Manila, 26 Outubru 2026 — Ministru Interior Timor-Leste, Francisco da Costa Guterres, Ph.D, partisipa iha Reuniaun Ministeriál ASEAN kona-ba Krime Transnasionál (20th ASEAN Ministerial Meeting on Transnational Crime – 20th AMMTC), iha Manila, Filipinas, hodi fahe esperiénsia no esforsu nasionál Timor-Leste nian iha kombate krime transnasionál, (21/10/2026).

Iha nia diskursu, Ministru Interior, hatete katak, Timor-Leste kompromete atu hametin kooperasaun rejionál hodi kombate krime transnasionál, liuliu krime sibernétiku (cybercrime), fraude dijitál, fraude online, lavajem osan, tráfiku ema no krime sira ne’ebé liga ho fronteira.

Ezekutivu esplika katak, hahú hosi fulan Juñu 2026, Polísia Nasionál, Polísia Sientífika Investigasaun Kriminál (PCIC) no Servisu Migrasaun hala’o operasaun konjunta hodi taka instalasaun balu ne’ebé suspeitu envolve iha fraude online no jogu ilegál. Operasaun hirak-ne’e konsege detén sidadaun estranjeiru liu 500, hosi nasaun ualu, no preende ekipamentu dijitál no osan.

“Governu Timor-Leste mós aprova Planu Nasionál Integradu 2026–2031 atu prevene no kombate fraude finanseira dijitál, plataforma fraude online, krime sibernétiku organizadu no tráfiku ema. Aleinde ne’e, Governu kontinua hametin seguransa fronteira no reforma lejislasaun migrasaun”, dehan MI,(21/10/2026)

MI subliña mos katak, la iha nasaun ida mak bele kombate krime transnasionál mesak. Tanba ne’e, Timor-Leste husu kooperasaun besik liután entre nasaun membru ASEAN, liuliu iha koordenasaun konsulár, investigasaun dijitál, investigasaun finanseira no intelijénsia migrasaun.

Ezekutivu mos afirma katak, Timor-Leste sei la permite nia territóriu sai fatin seguru ba krime transnasionál, no sei kontinua kontribui ba seguransa no estabilidade iha rejiaun ASEAN.

Ikus Governante hato’o agradese ba Governu Filipinas bele organiza reuniaun importante ne’e, no apresia mós apoiu hosi nasaun membru ASEAN, Sekretariadu ASEAN no parseiru internasionál sira ba Timor-Leste nia prosesu integrasaun iha ASEAN.#buy