Dili, 12 Outubru 2026 (SRPM) – Ministru Interior, Francisco da Costa Guterres, Ph.D., hala’o enkontru ho Diretóra husi kompañia IDEMIA, Shanti iha sala reuniaun Hotel, Singapore, (28 /09/ 2026).
Enkontru ne’e iha objetivu atu diskute kona-ba modernizasaun no transformasaun dijitál ba atendimentu pasajeiru iha fronteira Timor-Leste, inklui sistema IGTS, viza, no sinkronizasaun dadus pasajeiru iha sistema integradu ida.
Ministru Interior, Francisco da Costa Guterres, Ph.D, esplika katak, diskusaun ne’e importante atu dezenvolve sistema fronteira ne’ebé modernu, seguru no efisiente.
Iha enkontru ne’e, parte rua mós diskute pontu importante tolu, mak teknolojia ne’ebé adapta ba nesesidade nasionál, integrasaun sistema, no seguransa siber iha implementasaun sistema dijitál ba fronteira no servisu viza.
Aleinde ne’e, diskusaun mós inklui esperiénsia Singapura nian kona-ba sistema Arrival Card, ne’ebé permite pasajeiru prienxe informasaun antes to’o iha aeroportu. Sistema ida-ne’e bele sai referénsia ba simplifikasaun prosesu tama no sai iha fronteira Timor-Leste, hodi hadi’a kualidade atendimentu ba sidadaun no vizitante estranjeiru.
Iha parte seluk, reprezentante IDEMIA hateten, katak sira nian parte prontu atu fó apoiu ba nesesidade Ministériu Interior nian, liuliu iha dezenvolvimentu dijitál ne’ebé seguru ba jestaun fronteira.
Kooperasaun ne’e mós sei fó atensaun ba transferénsia koñesimentu no haforsa kapasidade rekursu umanu Timor-Leste nian, atu bele opera sistema dijitál ho di’ak no rezolve mesak dezafiu tékniku sira ne’ebé bele mosu iha futuru.
Governante ne’e realsa, Transformasaun dijitál iha fronteira espera atu hadi’a efisiénsia servisu, haforsa seguransa no fasilita movimentu pasajeiru, nu’udar parte husi esforsu Timor-Leste atu prepara-an ba integrasaun regional no preparasaun ba Simeira ASEAN 2029.#Buy
