Díli, 09 Outubru 2026 – Ministru Interior, Francisco da Costa Guterres, Ph.D, hala’o abertura ba Workshop Nasionál kona-ba Preparasaun El Niño ho tema “Reziliénsia Hahú iha Uma” (El Niño Preparedness: Resilience Starts at Home), ne’ebé hala’o iha Salaun Hotel Timor, Díli, sexta-feira ne’e

Workshop ne’e nia objetivu mak atu avalia impaktu istóriku El Niño ba setór oioin iha Timor-Leste, hametin komprensaun komún entre instituisaun governu no parseiru dezenvolvimentu sira, no promove kompromisu hamutuk ba asaun preparasaun no prevensaun hodi hamenus risku no impaktu El Niño.

Iha ninia intervensaun, Ministru Interior hato’o apresiasaun ba SEPS, APC, UNDP no parseiru dezenvolvimentu sira ne’ebé servisu hamutuk hodi realiza workshop ne’e, atu hametin preparasaun no resposta proativa hasoru impaktu El Niño.

Ministru esplika katak, El Niño bele lori konsekuénsia sériu ba moris komunidade sira, liuliu bainhira akontese bailoro naruk ne’ebé bele hamosu menus bee, afeta produsaun agríkola no hamenus disponibilidade ai-han. Iha tempu udan, risku inundasaun no dezastre naturál seluk mós presiza hetan atensaun.

“Tanba ne’e, ha’u apela ba APC no parseiru dezenvolvimentu sira, atu prepara an sedu liuhosi koordenasaun ne’ebé di’ak, identifika prioridade sira no fahe informasaun ba komunidade, hahú husi nivel nasionál to’o suku no área rurál sira,” dehan Ministru Interior.

Nia mós subliña katak jestaun no konservasaun rekursu bee sai hanesan prioridade importante atu minimiza impaktu bailoro naruk ba populasaun.

Ezekutivu hateten, liuhosi workshop ne’e, espera katak partisipante sira bele fahe esperiénsia no hanoin, hametin kooperasaun entre instituisaun sira, no konkorda ba medida konkretu hodi responde ba risku El Niño.

Ministru Interior mós husu ba APC no instituisaun relevante sira atu fó atensaun espesiál ba komunidade vulnerável sira, hodi asegura katak sira hetan protesaun no apoiu adekuadu bainhira dezastre naturál akontese.

Governante salienta katak, koordenasaun no komunikasaun efetiva entre instituisaun sira importante tebes, atu komunidade sira bele hetan informasaun ne’ebé konsistente no hala’o medida preparasaun ne’ebé koordenadu hodi hamenus risku no impaktu dezastre naturál.

Iha parte ikus,MI konkorda no tau prioridade ba medida preparasaun sira iha workshop ne’e.  No apela ba instituisaun relevante sira atu kontinua dezenvolve no implementa asaun konkretu ba preparasaun no prevensaun dezastre, hahú husi nivel nasionál, munisípiu, postu administrativu to’o komunidade sira iha área rurál.

Workshop nasionál ne’e mós liga ho komemorasaun Loron Mundial Redusaun Risku Dezastre, ne’ebé komemora kada tinan, no sei selebra iha loron 13 fulan Outubru tinan 2026, ne’ebe sei hala’o iha Munisípiu Covalima, Postu Administrativu Maucatar.#buy_rival