DILI, 30 Outubru 2026 (SRP) – Ministru Interior, Francisco da Costa Guterres, Ph.D, realiza vizita-surpreza ba funsionáriu kazuais na'in 59 husi Servisu Migrasaun ne'ebé hala'o hela formasaun durante semana tolu iha Sentru Formasaun Akademia Polísia, Comoro, sexta-feira ne’e.
Iha oportunidade ne'e, Ministru Interior hateten katak, formasaun ne'e importante tebes atu hasa'e koñesimentu, kapasidade no kompeténsia funsionáriu sira, liuliu iha área migrasaun, hodi prepara atu hala'o knaar nu'udar ajente migrasaun ho profisionalizmu.
Nia haktuir katak, funsionáriu ida ne'ebé atu hala'o knaar nu'udar ajente migrasaun tenke iha komprensaun ne'ebé di'ak kona-ba lei, regra no prosedimentu migrasaun nian. Tanba servisu migrasaun iha responsabilidade importante iha kontrolu no jestaun movimentu ema tama no sai husi territóriu nasionál.
“Husu imi atu aproveita oportunidade ida-ne'e ho responsabilidade, tanba atu sai ajente migrasaun, kada partisipante tenke liuhusi prosesu avaliasaun no teste ne'ebé determina imi nia kapasidade no preparasaun” dehan MI(30/10/2026).
Ezekutivu ne'e mós apela ba partisipante hotu atu mantein disiplina, respeitu malu no kumpre regra sira ne'ebé aplika durante prosesu formasaun.
MI salienta liutan katak, atitude disiplina, vontade atu aprende no komitmentu ba servisu públiku sei sai hanesan elementu importante atu forma funsionáriu sira ne'ebé iha kualidade, responsabilidade no integridade.
Governante ne’e realsa, Liu husi formasaun ne'e, espera katak partisipante sira bele dezenvolve kompeténsia atu hala'o knaar ho efisiénsia, profisionalizmu no responsabilidade, nune'e bele kontribui ba hadi'a kualidade servisu no modernizasaun institusionál iha Servisu Migrasaun.
Entertantu Formasaun ne'e nia objetivu atu hasa'e koñesimentu no kapasidade profisionál funsionáriu kazuais sira iha Servisu Migrasaun, hodi asegura katak sira iha komprensaun adekuada kona-ba lei, prosedimentu no knaar institusionál.
