Dili, 14 marsu 2024 (SRP) – Hafoin simu informasaun hosi fontes akreditadu Xefi Servisu Informasaun Polísia (SIP) Nasionál orienta kedas membru Aranha Leste hodi buka tuir autór sira ba krime públiku ekipa servisu konsege asegura joven-2 ne’ebé envolve iha kazu naok motór rua lakon iha loron 10 janeiru 2024, iha area Aldeia Bidau Mota Klaran, Suku Bidau Santana, Postu-Administrativu Cristo-Rei, Munisípiu Dili.
Inisia iha oras tuku 9 kalan ekipa servisu rekolla informasaun iha fatin akontesementu motór lakon no konsege identifika uluk suspeitu nain-1 ho naran inisiál AA, iha area Suku Kampo Alor, nia nudar mekaniku hosi Ainaro maibé hela iha Aldeia Baba Liurai, Suku Bemori, Postu- Administrativu Nain-Feto.
Hafoin dezenvolve ne’e konsege identifika tan suspeitu ida ho naran DFS nune’e ekipa lansa buska konsege hetan nia iha area Audian dalan ba Santa Cruz wainhira lao hela iha dalan ninin iha oras tuku 10 kalan.
Iha prosesu identifikasaun suspeitu sira koopera di’ak hodi deklara motór 2 ne’e sira naok iha fulan janeiru iha profesór ida nia uma ne’ebé lokaliza iha bidau Mota Klaran no fa’an ona ba ema seluk ho presu ne’ebé barratu tebes, Mio ho folin $200.00 no supra x125 folin $70.00 de’it.
Entretantu suspeitu DFS rasik envolve bebeik ona iha kazu hadau telfone iha Manleu, hadau vendedór kombustivel iha Bidau ne’ebé viral iha media sosiál inklui naok kapasete iha fatin publiku sira no nia promete sei buka tuir fali sasán hirak ne’e entrega ba autoridade kriminál.
Hafoin remata prosesu identifikasaun ekipa servisu halo kedas auto entrega suspeitu nain 2 hamutuk ho evidénsia motór ba Servisu Investigasaun Kriminál Nasionál hodi halo prosesu investigasaun no buka tuir tan motór ne’ebé lakon tanba foin mak hetan ida. #AX
