Dili, 15 Abril 2024 (SRP) – Membru Unidade Polísia Marítima (UPM) hosi Polísia Nasional Timor-Leste (PNTL) ne’ebe maka iha pasadu envolve an iha atividade Grupu Arte Marsias (GAM) no Grupu Arte Rituais (GAR) segunda-feira ne’e ofisialmente entrega ona sira nia atributu ba Governu liu husi Ministeriu Interior (MI).
Ministru Interior, Francisco da Costa Guterres,Ph,D, lori Governu nia naran agradese ba Komandu Jerál PNTL ne’ebé realiza serimónia ida ne’e tanba hahu ohin sira laos ona pertense ba grupu seluk.
“Serimónia ida ne’e importante tebes no sai hanesan ezemplu ida di’ak tanba PNTL atu servisu deit ba estadu no la vínkula tán organizasaun sira seluk. Serimónia ida-ne’e mos hatudu katak, ita bo’ot sira-nia domin no hanoin ne’ebé di’ak hadomi no servi ba estadu no povu ida-ne’e, hodi hatutan mehi ida ne’ebé, ita-nia eroi sira halo tiha ona iha rai rai ida-ne’e. Tan ne’e luta bá hodi lori benefisiu ba rai ida-ne’e”, hateten Ministru Francisco, perante nia diskursu iha Kuartel UPM Lecidere, (15/04/2024).
Tuir nia, pratika Arte Marsiais la’os buat ladi’ak maibé, membru grupu sira balun mak uza sala tiha arte marsiais hodi prejudika tiha ema seluk nia direitu.
“Ha’u lee ona sira nia estatutu ne’e di’ak, maibe membru sira mak uza sala tiha ba interese privadu sira hodi estraga tiha nasaun ida-ne’e. Ita lakohi ema mate tán de’it oho malu tanba ne’e mak Governu hasai desizaun ida-ne’e atu desvínkula tiha polísia nune’e bele halo atuasaun ho neutru ba kualker konflitu”, komenta.
Ezekutivu ne’e mos agradese ba membru UPM sira hotu tanba aktu ne’ebe hatudu nafatin konfiansa estadu no komunidade sira nian ba nia instituisaun Seguransa.
“Parabens ba Membru PNTL sira hotu, estadu iha fiar no konfiansa ba imi tanba imi mak kaer estabilidade ba rai ida-ne’e, nune’e dezenvolvimentu bele la’o ba oin. Agradese mós ba prezensa lider organizasoens arte marsiais no arte rituál sira, tanba ita bot sira-nia prezensa iha serimónia ne’e bele hamutuk organiza arte marsiais nune’e bele kontribui ba estadu ida-ne’e”, salienta.
Membru Governu ne’e apela nafatin ba membru PNTL tomak liu-liu ba sira ne’ebe maka seidauk entrega atributu atu halo deklarasaun hodi husik GAM no GAR tanba polísia iha nia regra atu labele asosia ka tama iha kualkér grupu ne’ebe maka lori instabilidade mai ita nia nasaun.
Serimónia ne’e, marka prezensa mós husi Komandante Jerál PNTL, Komisáriu Jeral Henrique da Costa, Segundu Komandante Jerál, Komisáriu Pedro Belo, Prezidente Komisaun Reguladora Arte-Marsiál (KRAM), Octaviano da Conceição, Komandante Munisipiu, Komandante Unidade no-mos lider Arte Marsiais no Arte Rituais sira. # Ekipa_SRPM
