Dili, 06 marsu 2024 (SRP) –Diresaun Jerál Servisu Migrasaun rekolla taxa ho montante $.18,240.00 ba ró rua ho naran Seabourn Soujor no Seabourn Odyssey hosi Austrália ne’ebé atraka iha Portu Díli ho turista rihun ida resin, wainhira halo vizita Timor-Leste iha loron kuarta dadeer ne’e.
“Ohin ita koloka membru hamutuk nain 25 ne’ebé maka lidera husi Xefi Sektór Fronteira Inspetór Polísia Agostinho da Costa, hodi halo atendementu ba turista hosi kontinente, Amérika, Europa, Áfrika, no Asia ho totál pasajeirus ho Crew hamutuk ema nain 1.463 ne’ebé halo vizita hosi Austrália mai Timor”, hateten Diretora Jerál Servisu Migrasaun, Inspetora Xefi Polísia, Adelaide da Rosa, iha nia knar fatin Vila-Verde.
Nia dehan, turista hirak ne’e mai ho objetivu atu haree fatin turístiku, sitiu relijiozu no fatin istóriku iha Timor-Leste nian liu-liu iha Kapitál Dili.
“Totál turista ne’ebé tun mai rai maran hamutuk ema nain 637, nain 608 mak selu visa kada ema $30 ema nain 29 free visa tanba husi Uniaun Europeia no Indonézia. Entaun totál taxa ne’ebé rekolla hamutuk $18,240.00, no sira halo vizita ba fatin turístiku iha Dili mak hanesan, Estatua Cristo Rei, Dare Memoriál, muzeu rezisténsia, sentru Chega iha antigu Komarka Balide, Tais Market, Semiteriu Santa Kruz no ba liu haree plantasaun café iha Gleno-Ermera”, relata.
Tuir Adelaide, Ro rua ne’ebé tula turista atraka iha Portu Dili ne’e halo vizita durante oras walu nia laran deit iha Timor-Leste, no iha lorokaraik sei Kontinua Viajen ba Kupang Indonézia. # (Char/AX)
