Dili, 22 fevereiru 2024 (SRP)-Ministru Interior, Francisco da Costa Guterres, Ph.D, hamutuk ho Ministru Negosius Estranjeiru no Kooperasaun, Bendito Freitas, Ministru Justisa, Sergio Hornai, no-mós Xefi Misaun IOM ba Timor-Leste, Ihma Shareef, halo enkontru kortezia ho Prezidente Repúblika hodi koalia kona-ba oinsá haforsa jestaun fronteira ne’ebé pozitivu iha Timor-Leste.
Asuntu prinsipál ne’ebé sita iha enkontru ne’e mak haree ba koordenasaun servisu iha area emisaun, renovasaun no produsaun pasaporte, aumezmu tempu kolokasaun adidu hosi Ministériu Justisa iha Embaixada Reinu Unidu, iha mós Korea do súl, karik bele mós iha Austrália, Írlanda atu bele garante asesu ba ita-nia sidadaun no traballadór timór oan sira iha diáspora.
Enkontru interministeriál ne’ebé kompostu husi Ministériu Interior, Ministériu Justisa no MNEK iha relasaun kooperasaun ho parseria dezenvolvimentu sira iha Timor-Leste, iha nivel interese kolektivu atu promove kooperasaun ne’ebé di’ak hodi mellora kapasidade servisu haforsa fronteira.
Prezidente Repúblika mós konsidera importante tebes, atu guvernu iha liña koordenasaun ne’ebé di’ak ho IOM tanba iha interese kolektivu atu promove kooperasaun hodi ajuda hadia sistema jestaun fronteira iha tinan balu nia laran liu-liu ajuda guvernu Timór-Leste servisu makas hodi kombate krime no tráfiku umanu husi autór rede krime organizadu sira. #(Fatinha/Buy).
