Liquica, 17 fevereiru 2024 (SRP) – Membru Komandu Polisia Nasional Timor Leste (PNTL), Munisipiu Liquica, hamutuk nain 19 entrega ona atributu Grupu Arte Marsiais (GAM) no Grupu Arte Rituais (GAR) ba Governu hodi serve deit ba estadu.
Ministru Interior Francisco da Costa Guterres, Ph.D, agradese ba Komandu PNTL nia esforsu hodi identifika membru sira ne’ebé iha pasadu envolve an iha pratika GAM no GAR.
“Hau lori governu nia naran hakarak agradese ba Komando Jeral PNTL, Komando Munisipiu Liquica no-mos ba iha membru sira ne’ebe voluntariamente mai entrega sira nia atributu tanba sira hakarak atu serve loos deit estadu liu hosi Polisia Nasional Timor Leste” informa Ministru Interior Francisco da Costa Guterres, iha seromonia ofisial ne’ebe hala’o iha Komandu PNTL Munispiu Liquica, (16/02/2024).
Nia dehan, Munisipiu Liquiça sai hanesan ezemplu dahuluk tanba sei halo mos iha munisipiu Baucau no munisipiu seluk hodi banati tuir.
“Hakarak agradese ba sira, kongratula sira agora atividade ida ne’e hanesan ezemplu ida para depois sei hanoin atu halo tan iha Baucau no fatin sira seluk tan ne’e sei lao nafatin ida ne’e para hakarak hatudu polisi laos partenense ba grupu ema ida ka rua nian maibe partense ba estadu”, afirma.
Govenate ne’e husu ba membru PNTL sira ne’ebe mak envolve iha GAM no GAR maibe ladauk entrega sira nia atributu atu bele entrega tanba papél PNTL maka atu garante estabilidade iha territoriu laran tomak.
“Ha’u hakarak apela ba membru sira hotu liu-liu ba sira ne’ebe mak seidauk entrega atributu mai para halo deklarasaun atu disvinkula ho desliga ho asosiasaun arte marsiais sira ne’e ha’u enkoraja sira atu bele mai hato’o tanba iha polisia ita iha regras ida katak labele asosia iha kualker grupu ne’ebe mak lori instabilidade lori problema ba ita nia nasaun” alerta.
Entretantu Ministru Juventude Desportu Arte no Kultura, Nelyo Isac Sarmento, agradese ba Ministru Interior no-mos Komandante Jeral PNTL, tamba aktu ne’ebe membru sira hatudu hanesan konfiansa povu nian ba instituisaun Seguransa.
“Ita hotu-hotu hamrik iha ne’e atu kumpri hodi hateten ita lakoi hare tan ita nia povu mata ben suli no sasan ruma estragus tamba deit aktividades asaun arte marsiais sira nian. Hau hakarak hateten katak, tuir lolos arte marsiais ne’e nia dutrina diak ba ita, maibe dala ruma ita involve demais haluha tia servisu prinsipal ne’ebe ita tenke halo, ita mos hakarak hare ita nia instituisaun sira liliu seguransa sira iha forsa ne’ebe diak hodi atua aktu kriminal sira ne’ebe mosu iha ita nia rai”, dehan Ministru Nelyo Isac Sarmento.
Iha fatin hanesan Komandante Jeral PNTL Komisariu Jeral Henrique da Costa, hateten nia parte orienta ona komandu munisipiu no unidade sira hodi kontinua halo serimonia hanesan tuir fatin ne’ebe identifika ona.
“Ita nia planu ba Komandu PNTL Munisipiu husi parte Leste ninian tantu Lautem, Viqueque, Baucau no Manatutu, ita bele realiza deit iha Komandu PNTL Munisipiu Baucau, depois ba iha rai klaran ninia hanesan Aileu, Ainaro no Manufahi ita sei realiza iha Komandu PNTL Munisipiu Ainaro, depois Ermera, Bobonaro no Covalima depois mak ita sei hare Munisipiu Dili no mos Kuartel Jeral rasik”, informa Komandante Jeral PNTL.
Lider masimu PNTL ne’e mos apresia ba membru sira ne’ebe entrega ona sira nia atributu GAM no GAR tanba sira halo tuir orientasaun komandu ninian no komandu sei la foti sansaun ruma ba sira.
“Ba membru sira ne’ebe lakoi koopera, komandu iha nia medida rasik, tamba governu nia desizaun mak boot liu se ita la kumpri ita atu kumpri los ba sé, Ita bele deside ita hakarak nafatin servisu iha Instituisaun PNTL ka ou ita hakarak atu servisu iha Organizasaun Arte Marsiais ne’ebe mak ita nafatin defende ba”, alerta.
Rekorda fali katak, hafoin realiza parada iha loron 17 fulan Dezembru tinan 2023 iha Palacio Governu Komandu orienta kedas ba iha Komandu Munisipiu sira hodi identifika membru sira ne’ebe envolve iha Grupu Arte Marsiais no Grupu Arte Rituais ne’ebe governu suspende.
Entretanntu atributu GAR no GAM ne’ebe entrega husi Membru Komandu PNTL Munisipiu Liquica ba Ministru Interior hamutuk 18 no Komandu RAEOA 1 total 19. Atributu hirak ne’e mak hanesan, PSHT 10, IKS 3, KORK 1 no Arte Ritual (77) 5.
Hola parte iha seromonia ofisial ne’e, envolve, Komandante Komandu Pessoal no Formasaun, Arquimino Ramos, Komandante Komandu Munisípiu Liquica, Superintendente Polísia, Paulino Carmo Perreira, membru Komisaun Reguladora Arte Marsiais (KRAM) no-mos lider arte marsiais no rituais sira.
#DawnloadServiços Relações Públicas
