Atabae, 16 novembru 2023 (SRP) – Ministru Interior, Francisco da Costa Guterres, Ph.D, hamutuk ho Sekretariu Estadu Protesaun Sivíl, Domingos Mariano Reis, ofisialmente halo abertura formasaun kona-ba prevensaun konflitu ba pontu fokál no mediadór Diresaun Nasionál Prevensaun Konflitu Komunitáriu (DNPKK), husi munisípiu sanulu resin rua inklui Rejiaun Administrativa Espesiál Oekuse Ambeno ( RAEOA) ne’ebé hala’o iha Postu administrativu Atabae, Munisípiu Bobonaro.
Iha abertura Ministru Interior, Francisco Guterres, hateten formasaun ida-ne’e hodi aselera progresu prevensaun konflitu, hari’i paz no estabilidade nasionál iha Timor laran tomak.
“Kursu ou formasaun ida-nee importante atu fó hela bukae ba ita boot sira nudar mediadór no pontu fokál hodi hadi’a koñesimentu klean no ajuda estadu ida-nee, atu harii paz no estabilidade iha ita-nia rain”, esplika Ministru Francisco, iha Sentru Treinamentu Primeiru Sarjentu Aquelis da Silva Rairobo, kinta feira ne’e (16/11/2023).
Nia dehan, partisipante ba etapa ida-ne’e mesak foinsa’e timoroan hamutuk ema nain 269 kompostu hosi feto 96 no mane 173 sei aprende difinisaun sira kona-ba prevensaun konflitu nian hodi servisu hamutuk ho Autoridade lokál sira liliu lideransa komunitaria, lider relijioju, veteranus, lia nain no-mós ofisiál Polísia Komunitaria sira.
“Imi sira hamriik iha ne’e sei ba iha munisípiu, entaun imi sira ne’e ita bolu elementus prinsipais ba ajuda komunidade no ajuda estadu hametin paz, imi-nia knaar nee laos buat halimar ida, imi nee ema importante estadu nian para koloka imi iha ne’eba para halao knaar iha baze ajuda estadu, imi iha knaar lubun boot ida imi sei halo iha ne’eba”, fundamenta.
Ezekutivu ne’e salienta, servisu iha area prevensaun konflitu ne’e laos buat fasíl, tanba ne’e maka persija iha formasaun atu oinsá bele aprixima ho komunidade no uza termus ida ne’ebé atu uza ba mediasaun iha nivel Munisipál, Postu to’o Suku sira hotu iha territóriu nasionál.
“Primeiru imi ba iha ne’eba hodi detekta pontus situasaun, katak wainhira haree iha problema ruma ne’ebé afeita estadu ida-nee, imi bele fó imi-nia koñesimentu no buka atu prevene. Imi mós bele halo mediasaun, iha problemas ajuda, bolu ema halo diálogu, atu rezolve, imi labele sente aan katak imi ne’e la vale, imi tenke tau imi-nia an hanesan elementus importante atu ajuda estadu ida-ne’e harii paz no estabilidade atu bele dezenvolve rai ida-ne’e”, dehan tán.
Nia hatutan, mediadór hirak ne’e, sei sai hanesan parte integrante ida husi DNPKK atu habelar Diresaun ne’e nia knar no responsabilidade iha baze, hanesan Munisípiu, Postu Administravu, Suku, Aldeia, liu-liu iha bairu ne’ebé sira hela ba.
“Knar importante seluk ne’ebé atu halo maka atu identifika sinais konflitu sira ne’ebé akontese no fahe informasaun ba komunidade sira kona-ba servisu rezolusaun konflitu nian nune’e bele ajuda kria estabilidade. Tanba laos Polísia deit maka atu fó seguransa, maibé estabilidade ne’e sai responsabilidade ema hotu liu-liu hirak ne’ebé maka tutela iha Ministériu Interior nia okos”, tenik tán.
Iha okajiaun ne’e Ministru husu ba formandu sira atu prepara mentál hodi simu materia sira hosi formadór sira ne’ebé sei fo hosi PNTL no-mós membru Guvernu sira.
“Ministru lubuk boot ida sei mai iha ne’e atu koalia kona-ba programas governu hodi dezenvolve rai ida-nee nian para imi entende diak, liu-liu iha area dezenvolvimentu area rurais, empregu, kooperativa, agrikultura no-mós area minerais nian. Ba materia sei hala’o durante semana tolu nia laran ne’e importante tebes ba imi-nia servisu tanba imi sei entende kona-ba konstituisaun no kestoens legais sira nunee imi bele ajuda autoridade lokál, ajuda polísia atu bele oinsá rezolve krime sira ne’e iha terenu. tanba ne’e husu ba imi tuir ho didiak, haree ba oin, haree ba estadu, haree ba nasaun para dezenvolve rai ida-nee, ba oin”, subliña.
Iha oportunidade ida-nee Ministru Interior hato’o agradesementu wain ba Sekretariu Estadu Protesaun Sivíl ne’ebé orienta Seguransa Sivíl no Bombeiros hodi fó apoiu ba Komisaun Organizadora, Komandu Jerál PNTL, Komandante Sentru Formasaun, liuliu instrutór sira ne’ebe fó formasaun no-mós Diresaun Jerais Ministériu Interior sira.
Hola parte iha seremónia ne’e envolve, Diretór Jerál Seguransa no Prevensaun Konflitus, Gaspar Pereira de Sousa, Diretór Jerál Administrasaun Finansas, Mariano de Araujo, Komandante Komandu Pesoál no Formasaun, Superintendente Xefi Polísia, Arquimino Ramos, Komandante UPF interinu, Superintendente Asistente Polísia Carlos Moniz Maia, Diretora Nasionál DNPKK, Lidia de Carvalho, Segundu Komandante Sentru Formasaun PNTL, Emilio do Santos, lider komunitaria, lider relijioju, veteran, Komandante Eskuadra Atabae no-mós komunidade sira ne’ebé hela besik iha area refere. #(Oscar/Fatinha/AX).
