Bobonaro, 05 novembru 2023 (SRP) – Ministru Interior (MI), Francisco da Costa Guterres, Ph.D, hamutuk ho Sekretáriu Estadu Protesaun Sivíl (SEPS), Domingos Mariano Reis, halo akompañamentu ba Primeiru-Ministru (PM), Kay Rala Xanana Gusmão, hala’o diálogu komunitaria hodi buka solusaun ba problema ne’ebé akontese ba komunidade sira iha Suku Lourba no Suku Carabau, Postu-Administrativu Bobonaro, Munisípiu Bobonaro.
“Horkalan hau mehi at lao mai rona katak joven sira sunu uma. Se ita permite katak buat ne’e lao nafatin loron seluk sei kontinua sunu malu nafatin. Imi uma laran deit mak baku malu, ta malu no oho malu fali ne’e domin família laiha ona tanba jura ona ba ida-idak nia organizasaun”, hateten PM Xanana, wainhira kontinua mai halo dialogu komunitaria iha Suku Carabau, Postu-Administrativu Bobonaro.
Nia dehan, durante peridou funu laran timoroan tomak laduni inimigu ho kilat ka Arte Marsiais maibé povu mak duni ho pregu nune’e nia akresenta povu mak eroi loloos.
“Ba Nai Lulik sira reja ba joven sira atu ita labele odio malu iha fatin ne’e. Hahú ohin husu ba katuas lia nain sira reja ba Maromak ajuda ita husu ba rai lulik sira hamutuk perdua ita la estraga ita la duni la oho malu tan ona”, salienta.
Xefi Guvernu ne’e hatutan, jovem barak treinu GAM no GAR sai forte fizikamente de’it maibé laiha ona aspeitu sira hanesan domin ba ema seluk, respeitu malu, solidariedade, haraik aan .
“Se imi tama karik iha desportu hodi manan medalla ouro ruma ita hotu sei basa liman. Agora ita ukun aan tiha Suku balu obriga ema tama ida-ne’e tama ne’eba hodi baku malu to’o mate halo inan- aman mak terus tán hodi deve osan sosa kaixaun ba hakoi” dehan tán.
Iha biban ne’e PM Xanana husu ba jovem sira atu valoriza ran barak ne’ebé fakar ba rai ida-ne’e no ruin barak lakon to timor hetan nia ukun aan.
“Funu hahu hosi Batugade to Salele laos ema ida mak halo funu maibé povu mak duni inimigu ho pregu. Sira mate ne’e lahusu buat ida ba ita. En vez ita hanoin valoriza sira-nia sakrifiksiu luta to’o mate ne’e lae, ita ba fali komparte ema seluk nia arte marsiais hodi ita baku malu no estraga malu”, fó hanoin.
Lider nasionál ne’e mós kondena makas jovem sira baku no oho malu inklui harahun populasaun sira-nia sasán ho estraga pás iha sosiedade nia leet lori hamosu fali ambiente terrór no ta’uk.
“Hau mai to’o iha ne’e nudar Primeiru-Ministru hau preokupa laos deit iha ne’e maibe iha Suai no-mos Baucau. Problema ida ne’e mak ita husik deit labele. Hau sei bolu iha Konsellu Ministru hasai rezolusaun hodi taka tiha Arte Marsiais”, afirma.
Dialogu komunitaria ne’e hetan mos prezensa hosi Komandante Komandu Operasaun PNTL, Superintendente Xefi Polisia Jose Soares, Komandante PNTL Munisipiu Bobonaro, Superintendente Xefi, António Maria de Sá, Komandante UEP, Superintendente Damião Correia, Prezidente Autoridade Munisipiu Bobonaro, Prezidente Komisaun Reguladora Arte Marisiál no-mos veteranus sira iha Suku refere. # (Oser/Fati/AX).
+59
All reactions:
342
