Dili, 27 maiu 2024 (SRP) – Komandu Polísia Nasional Timor-Leste (PNTL) Unidade Polísia Maritima (UPM) ohin hamutuk estrutura tomak selebra aniversáriu loron ba dala-21 ho tema: “Garantir e Promover a Segurança na Área Costeria, de Modo a Contribuir Para O Processo de Desenvolvimento no Aspeto da Economia Azul.
Ministru Interior Franscisco da Costa Guterres iha ninia diskursu hato’o parabéns ba UPM tanba dezempeña papel importante tebes ba rai ida-ne’e.
“Ita bo’ot sira parte integrante ida hodi mantein soberania nasaun ida-ne’e nian, tanba ne’e maka komponente ida ne’e importante tanba komponente ninia papel maka oinsá atu halo prevensaun iha tasi liuhusi kontrolu efetivu liu iha tasi, oinsá mós atu halo kombate aktividade ilegais hodi bele liberta ita nia tasi ne’e husi aktividade ilegais ne’ebé bele destroi/estraga ita nia rai no ita nia ekonomia. Tanba ne’e maka ho komemorasaun ida-ne’e hakarak hato’o dala ida tan parabéns ba ita bo’ot sira hotu nia servisu ne’ebé diak tebes durante ne’e”, hateten Ministru Interior, iha Kuartel UPM, Lecidere, segunda (27/maiu 2024).
Governante ne’e hatutan, UPM iha papel importante ida tan maka halo buska no salvamentu iha tasi wainhira komunidade hetan susar iha tasi klaran.
Entretantu, Komandante UPM Superintendente Polísia Eugenio Pereira iha ninia breves palavras hateten iha loron 27 fulan Maiu tinan 2003 Timor oan ne’ebe servi iha instituisaun PNTL hahu’u simu responsabilidade ba iha Autoridade Polísia husi Polísia Nasoens Unidas ninian, responsabilidade ne’ebé PNTL assume orienta liu ba misaun atu garante seguransa ba iha zona Maritima, ne’ebe PNTL asume.
“Iha eventu ida-ne’e akontese hanesan parte ida ne’ebé bele kompleta liu tan misaun iha instituisaun PNTL tuir mandatu Konstitusionál ne’ebé hetan ona aprovasaun husi Asembleia Konstituente ne’ebé atribui ba iha instituisaun PNTL, iha tinan 2004 Governu aprova Dekretu Lei Nu.09 Lei Orgánika PNTL ne’ebé promulga husi Prezidente Repúblika no Transforma Unidade Seguransa Marítima ba iha Unidade Polísia Marítima (UPM), difine mós Misaun ne’ebé atribui ba UPM maka hanesan Prevensaun no Supresaun ba krime jerál noi aktu ilísitu sira seluk ne’ebe akontese iha area Kosteria”, dehan Komandante UPM ne’e.
Komandante Eugenio, haktuir tan katak Prevensaun no Kombate Polusaun iha Tasi ninian, Seguransa moris ema ninian no mós rekursu minerais ne’ebé iha tasi Timor ninian. UPM iha faze iha ne’ebé kontinua reforsa ninia misaun hodi garante seguransa iha territóriu tasi Timor-Leste liu husi Estabelesimentu Postu Vijilánsia iha area Kosteria, estabelese ekipa ne’ebé ho nia misaun atu halo salvamentu no buska, no wainhira ita nia sidadaun sira hetan dezastre iha territóriu tasi Timor-Leste ninian.
“Durante ne’e ita mós patrullamentu ne’ebé identifika hanesan potensia ba iha aktividade peska ilegais, importasaun no mós kazu kontra-bandu, halo mós dezeminasaun informasaun ne’ebé pertenente ba iha seguransa ema nian wainhira halo aktividade iha tasi, liu-liu ba ita nia komunidade sira ne’ebé hala’o aktividade peska no mós utiliza transprte marítima husi Dili ba Atauro, aktividade sira ne’e hanesan parte husi asaun prevensaun ne’ebé membru UPM hala’o bazeia ba iha Misaun ne’ebe atribui ona ba UPM”, haktuir Superintendente Polísia ne’e.
Iha fatin hanesan Komandante Jerál en-subtituisaun aktuál Segundu Komandante Jerál PNTL Komisariu Polísia Pedro Belo iha ninia diskursu hateten PNTL hanesan instituisaun Estadu atu defende Legalidade Demokrátiku, Garante Seguransa ba ema ho nia sasán sira atu asegura direitu liberdade ema nia tuir termu Konstituisaun no Lei sira seluk.
“UPM hanesan Unidade espesial ida ne’ebe iha responsabilidade hodi asegura vijilánsia patrullamentu no halo fiskalizasaun iha liña Kosteria, domíku públiku marítima iha ambiente prevensaun no kombate kriminalidade en jerál no ilísitu sira seluk, ekivamente tasi iha ninia importansia polítika, ekonomiku komersiál no sosiu kulturál vitál iha konstrusaun ba identidade nasionál, karakteristika jeo-estratéjika territóriu nasionál hanesan fatin kruzada ba rotas komersias ne’ebé utiliza barak liu iha ligasaun entre oseanu índiku no oseanu pasífiku nune’e hodi hameta potensiál iha nivel rejionál no internasionál”, haktuir Komandante Jerál en-subtituisaun ne’e.
Segundu Komandante Jerál PNTL ne’e salienta liu tan katak ohin loron importante tebes atu iha polítika nasionál hodi atu koloka tasi hanesan elementu sentrál ida iha operasionalizasaun, estratéjika nasionál ba seguransa dezenvolvimentu Timor-Leste hanesan forma ida atu promove benefisiu ruma husi oportunidade sira ne’ebé maka iha, maibé liu husi risku no ameasa oin-oin no kompleksu ne’ebe iha potensia prejudika interese nasionál.
Iha sekuensia serimónia aniversáriu UPM ba dala XXI ne’e, fahe mós Sertifikadu Louvor ba membru UPM na’in rua. Iha mós atraksaun husi membru UPM kona-ba Abordagem ba Ró Buska no Salvamentu ba suspeitu sira ne’ebe maka hala’o aktividade peska ilegais iha area Kosteria tasi nian no atraksaun Banda Múzika husi estudante Sekundaria Canossa.
Hola parte iha serimónia ne’e Ministru Juventude, Desportu, Arte no Kultura, Sekretariu Estadu Protesaun Sivíl, reprezentante Xefe Estadu F-FDTL, reprezentante Komandante Komponente Naval, Korpu Diplomátiku, Adidu Seguransa, Adidu Militar, Prezidente Autoridade Munisípiu Dili, Komandante Komandu Supervizaun PNTL nian, Komandante Munisípiu, Unidade, Xefe Departamentu, Xefe Gabinete, Xefe Servisu, Prezidente AESPNTL no estrutura, Komandante UPM ho estrutura inklui família AESPNTL UPM nian. #Media PNTL
