Dili, 29 agostu 2023 (SRP) –Ministru Interior (MI), Francisco da Costa Guterres, Ph.D, hateten sei halo revizaun ba Estatutu PNTL no husu Komandu PNTL reativa fali saláriu mensal ba membru PNTL reformadu na’in-158 ne’ebe antes ne’e Governu anteriór aplika ona reforma hodi fila bá vida sivíl.
“Agora dadaun ami deskute hela Lei Orgánika Ministériu Interior nian iha Konsellu Ministru, kuandu iha aprovasaun ona mak foin bele halo revizaun ba Estatutu no dipoloma legal sira seluk. Ha’u mós husu ona ba PNTL, para reativa sira-nia saláriu depois mak sei lori diploma legál ba iha Konsellu Ministru hodi aprova”, dehan Ministru Interiór, Francisco Guterres, hafoin partisipa enkontru Konsellu Ministru extraordinária iha Palásiu Governu, Tersa (29/08/2023).
Kestiona kona-ba Lei Orgánika Ministériu Interior nian, Governante ne’e hateten laiha nesesidades barak atu harii diresaun foun, maibé sei hadiak liu tán funsaun sira ne’ebé eziste ona hodi servisu ho susesu liután.
“Intituisaun sira ne’ebé tutela iha Ministériu Interior mak hanesan PNTL, Sekretária Estadu bá Protesaun Sílvil (SEPS), Autoridade Protesaun Sívil (APC-Sigla Português), Servisu Migrasaun (SM) Diresaun Prevensaun bá Konflitus, Seguransa Sívil ho diresaun sira seluk, tanba ne’e laiha nesesidade atu kria foun tán”, subiña.
Governante ne’e subliña katak, Instituisaun sira ne’e ne’ebé eziste kleur ona, importante mak iha Lei Orgánika ida hodi define klaru liutan sira-nia papel no fó tan servisu barak tán, hodi halo servisu di’ak liutan ho kompetensia hodi dezenvolve liután funsaun ho di’ak. #
Autor : Abui
Editor : Fatinha
Fotos : AX
