Dili, 24 outubru 2023 (SRP) – Ministru Interior, Francisco da Costa Guterres,Ph.D, hato’o nia komprometidu ba Assosiasaun Espoza PNTL, sei tau matan no sei haree orsamentu tau iha Fundu hodi apoiu Asosiasaun Esposa Polísia Nasional Timor-Leste (AES-PNTL) nia servisu.
“Agradese ba inisiativa AESPNTL nian hodi hala’o workshop ne’e no hau louva tebes tanba bele ajuda hamosu ema nia konsiensia kona-ba moras kontazioju sira hanesan kankru susun no mós kankru serviks. Ida ne’e esforsu diak tebes, kuantu mais atividade ne’e mai husi espoza PNTL sira, tanba ne’e hare’e ba Asosiasaun nia esforsu ho limitasaun fasilidade ne’ebe sira iha, governu liu husi Ministeriu Interior sei hare’e hodi bele fó apoiu tanba ho sira nia prezensa ne’e bele motiva membru PNTL hala’o servisu diak liu”, hateten Ministru Interior, Francisco Guterres, iha Sentru Formasaun Polisia, Comoro, tersa, (24/10/2023).
Nia dehan, MI mós kompromete sei kria kondisaun ba AES-PNTL hodi fasilita transporte ida atu ajuda sira nia servisu ho diak liutan.
“Ema matenek ida dehan nune’e behind every successful man there stands a woman, ne’e dehan katak mane sira susesu ne’e tanba feto sira iha sorin. Mane sira hetan difikuldade barak maibe imi feto nia apoiu importante hodi hamrik iha sira nia kotuk dudu sira halo servisu diak liutan” salienta.
Membru governu ne’e hatutan, prezensa AESPNTL nian mós bele ajuda PNTL iha parte seluk hanesan saúde hodi halo tratamentu ba membru sira ne’ebe moras, asaun karidade hodi tulun ita nia komunidade sira ne’ebe kbi’it laek.
Iha biban ne’e Francisco Guterres mos husu ba parseria lokal sira hanesan Fundasaun Alola no Ministeriu Saude atu apoia ASPNTL hodi bele kontinua halo sensibilizasaun ba feto sira iha munisipiu seluk atu bele entende kona-ba moras kankru nune’e bele halo prevensaun.
Seminariu ho tema “Kankru Susun No Kankru Serviks ne’e organiza hosi AESPNTL no servisu hamutuk ho Fundasaun Alola, liu husi Programa HALIKU (Hau Hili Atu Kura) no Ministeriu Saúde liu husi Departamentu Moras La Hadaet (Non CDC), ho objetivu atu fahe kuñesimentu ba prevensaun no tratamentu ba Kankru Susun no Kankru Serviks.
Marka prezensa iha seminariu ne’e envolve Vise-Ministru ba Fortalesimentu Institusional Saúde José dos Reis Magno, Komandante Jerál PNTL Komisariu Jerál Polísia Henrique da Costa, Segundu Komandante PNTL Komisariu Pedro Belo, Diretora Ezekutiva Fundasaun Alola Maria Guterres, Prezidente AESPNTL Manuela de Araújo, mediku no espesialista sira hosi HNGV inklui koordenadora AESPNTL munisipal sira. # (Bui, Fatinha, AX).
