Dili, 25 jullu 2023 (SRP) – Ministru Interiór (MI), Francisco da Costa Guterres, phD, akompaña husi Diretora Jerál Servisu Migrasaun, Inspetora Xefi Polísia Adelaide da Rosa, simu vizita Audiénsia husi xefe Misaun Organizasaun Internasionál Migrasaun – (IOM sígla inglés) Iha Timór-Leste, Ihma Shareef, iha Gabinete MI-Vila-Verde, Tersa-feira ne’e.
Objetivu husi vizita ne’e, kontinua hametin Kooperasaun entre Ministériu Interior ho IOM ba implementasaun Migration Internal Data Analysis System (MIDAS) ne’ebé mellora no analiza dadus hodi minimiza riskus ne’ebé mak koloka hosi movimentu migrasaun nian hala’o ona nia operasaun iha dezembru tinan 2022.
Entretantu, IOM halo kolaborasaun ho Governu, halo ona lansamentu ba Perfil Migrasaun iha dezembru tinan kotuk nudar instrumentu ida ne’ebé pertense ba nasaun kompostu hosi dadus migrasaun nian hodi dezenvolve no formula polítika bazeia ba evidensias. Ho apoiu hosi Fundus Dezenvolvimentu Interna IOM nian, Perfil refere bele fornese ba Governu dadus ne’ebé kredivel no konfiavel hodi formula no elabora prioridade xave sira iha area migrasaun nian.
Pérfil Migrasaun destaka kompleksidade migrasaun nian iha Timor-Leste inklui razaun tanba sa migrasaun akontese, razaun sira ne’e nia abut mak formasaun, bem estar sosiál, infrastrutura no dezenvolvimentu. Pérfil ne’e mós bele sai fontes primaria ba dadus migrasaun ne’ebé kredivel ka konfiavel ba formuladores polítiku ka decision makers sira. Tanba ne’e se hakarak istoria migrasaun Timor nian ida susesu, tenke servisu hamutuk hodi asegura katak migrasaun ida-ne’e eskolla ida bem informadu, ne’ebé mak promove migrasaun ida ordenadu no umanu ba benefisiu ema hotu nian. # Elisa.
