Díli, 24 novembru 2023 (SRP) – Ministru Interior, Francisco da Costa Guterres, Ph.D, akompaña husi Sekretáriu Estadu Protesaun Sivíl, Domingos Mariano Reis hala’o sorumutuk ho Ministru Juventude, Desportu, Arte no kultura, Nelyo Isaac Sarmento, Prezidente Komisaun Reguladora Arte Marsiais (KRAM) Octávio da Conceição, Segundu Komandante Jerál PNTL, Komisáriu Pedro Belo no Diretor Geral Seguransa e prevenesaun konflitus Gaspar Pereira de Sousa hodi asina despaixu konjuntu implementasaun rezolusaun governu, iha Gabinete Ministru Interior Vila-Verde.
Objetivu husi sorumutuk ne’e hodi asina despaixu konjuntu ida kona-ba implementasaun rezolusaun governu númeru 45/2023, 10 novembru ne’ebé determina suspensaun kona-ba ensinu, aprendizajen no prátika arte marsiais no adosaun, medidas hodi asegura orden públika.
Iha biban ne’e, Ministru Interior afirma katak, Despaixu konjuntu entre Ministru Juventude, Desportu, Arte no kultura ho Ministériu Interior atu implementa rezolusaun kona-ba suspensaun ba atividades arte marsiais, oinsá PNTL ho KRAM servisu hamutuk hodi identifika no kontrola fatin –fatin sira ne’ebé uza hodi treinu, hahú husi munisípiu to’o postu administrativu no suku sira iha territóriu nasionál, karik iha terrenu mak sira la kumpri no dezobedese ba rezolusaun ne’e mak sei prosesa tuir lei. #Liza.
