Dili, 06 dezembru 2023 (SRP) – Hafoin remata Semináriu Internasionál Grupu Konsultivu Rejionál (RCG;Sigla ingles), sesaun da-9 kona-ba Humanitarian Civil-Military Coordination Asia-Pasific iha Suai Room Timor-Plaza Dili, Ministru Interior, Francisco da Costa Guterres, hamutuk ho Sekertariu Estadu Protesaun Sivíl Domingos Mariano Reis, halo seremónia despedida ho jantar konfraternizasaun hodi hametin relasaun di’ak ho nasaun parseria sira.
“Ida-ne’e hanesan onra no priviléjiu boot ida ba ha’u atu simu imi hotu iha ámbitu semináriu sesaun anuál ba dala sia ne’ebé envolve Grupu Konsultivu Rejionál kona-ba Koordenasaun Sivíl-Militár Umanitariu ba Ázia no Pasífiku iha Timor-Leste. Ha’u komprende katak hafoin halo tiha diskusaun formál intensivu no fahe esperiénsia lubuk ida naton ona atu ita kontinua hametin ita-nia relasaun di’ak iha futuru”, esplika Francisco Guterres, liuhosi nia diskursu iha Timor-Plaza, (05/12/2023).
Governante ne’e agradese ba Grupu Konsultivu Rejionál ne’ebé mai fahe esperiénsia no deskuti aspetu sira ne’ebé relasiona ho kampu koordenasaun sivíl-militar umanitária ligadu ho dezastre naturais.
“Ha’u hakarak aproveita momentu ida-ne’e hodi apresia apoiu husi United Nations Office for the Coordination of Humanitarian Affairs (OCHA), Gabinete Rejionál Ázia no Pasífiku, Sentru Jestaun Dezastre Estadus Unidus nian no-mos Sentru Sivíl-Militár Austrália nian ne’ebé servisu hamutuk ho ami-nia Autoridade Protesaun Sivíl nu’udar mós Ko-Sekretariadu Grupu Konsultivu nian ne’ebé organiza eventu ne’e ho susesu tebes”, subliña.
Bainaka sira akompaña hela atrasaun dansa kulturál husi LEJEVAL
Ezekutivu ne’e garante katak, Governu liuhusi Autoridade Protesaun Sivíl ne’ebé mak tutela Ministériu Interior nia okos, iha kompromisu atu servisu hamutuk ho parseiru rejionál no globál sira hodi atinje objetivu komún sira.
“Ha’u fiar katak Timor-Leste iha interese di’ak liu atu servisu hamutuk ho parseiru rejionál sira liuhusi plataforma no mekanizmu oin-oin inklui RCG, hodi responde ba dezafiu seguransa komún sira ne’ebé hasoru iha rejiaun ne’e. Timor-Leste adopta ona aprosimasaun kooperativa seguransa nian hanesan reflete ona iha Konseitu Estratéjiku Nasionál Defeza nian ka iha tinan 2015 adopta ona hodi hatán ba dezafiu seguransa nian iha tempu modernu”, tenik tán.
Ministru Francisco garante katak, RCG sai ona plataforma importante no relevante ida hodi troka informasaun no ideia sira hodi permite resposta dezastre ne’ebé koordenadu, kualidade, efisiente efetivu ba asaun operasionál hodi responde ba emerjénsia ruma ka dezastre ne’ebé sei mosu mai iha territóriu nasionál. # (Bui/AX).
