Dili, 02 fevereiru 2024 (SRP) – Ministru Interior (MI), Francisco da Costa Guterres, Ph.D, hamutuk ho membru governu inklui eis titular sira, partisipa iha serimónia aniversáriu transformasaun Forsa Armada Libertasaun Nasionál Timor-Leste (FALINTIL) ba Forsa konvensionál ho naran Forsa Defeza Timor-Leste (F-FDTL) ba dala 23, ne’ebé prejide husi Vise-Prezidente Parlamentu Nasionál, Dr. Alexandrinho Afonso Nunes, iha Quartel Jeral F-FDTL, Fatuhada Dili.
Enkuantu iha ámbitu aniversáriu ezisténsia transformasaun forsa guerilla ba forsa regular ne’e halo mós promosaun deviza ba militar sira, inklui selebra loron moris Tenenti Jenerál Reformadu F-FDTL, Lere Anan Timur ne’ebé monu iha loron hanesan.
Serimónia ho tema “Tempu Profesionaliza no tempu moderniza ” ne’e hetan mós partisipasaun hosi Prezidente Tribunál Rekursu, Dr. Deolindo dos Santos, Xefe Estadu-Maior Exérsitu Portugal, Jenerál Eduardo Manuel Braga da Cruz Mendes Ferrão, Membrus Parlamentu Nasionál, Membrus IX Governu, Sosiedade Sivil, eis titular orgaun soberania, veteranu, korpu diplomatiku, Ofisiais Superiores, Komandante Komponente no Unidade F-FDTL, ofisias Kapitães, Subalternus, Sarjentu no Prasas inklui komunidade sira.
