𝐓𝐋 𝐑𝐄𝐀𝐅𝐈𝐑𝐌𝐀 𝐊𝐎𝐌𝐏𝐑𝐈𝐌𝐈𝐒𝐈𝐔 𝐊𝐎𝐌𝐁𝐀𝐓𝐄 𝐅𝐑𝐀𝐔𝐃𝐄 𝐎𝐍𝐋𝐈𝐍𝐄 𝐈𝐇𝐀 𝐊𝐎𝐍𝐅𝐄𝐑𝐄́𝐍𝐒𝐈𝐀 𝐈𝐍𝐓𝐄𝐑𝐍𝐀𝐒𝐈𝐎𝐍𝐀́𝐋 

Phnom Penh, 25 Setembru 2026 — Ministru Interior, Francisco da Costa Guterres,Ph.D, reafirma kompromisu Governu Timor-Leste atu hametin kombate kontra fraude online, krime sibernétiku organizadu.

Iha Konferénsia Internasionál kontra Fraude Online, ho tema “Acting Together towards Breaking the Chain and Eradication of Online Scams” , Ministru Interior hato’o apresiasaun ba Governu Reinu Cambodia tanba organiza konferénsia altu nível ida-ne’e iha Phnom Penh, Cambodia, 23/09/2026

Francisco da Costa Guterres,Ph.D, hateten,  katak fraude online evolui ona sai indústria kriminál transnasionál ida ne’ebé organizadu, ho rede sira ne’ebé opera liuhusi fronteira no uza plataforma dijitál, sistema finanseiru no vulnerabilidade jurisdisaun sira atu halo fraude hasoru ema no ekonomia iha mundu tomak.

Nia mos fó sai katak, operasaun ba fraude iha Dili no munisípiu sira besik Dili deskobre indikadór kona-ba tráfiku ema no servisu forsadu. Liuhusi operasaun sira-ne’e, ema servisu liu 50 hetan deteta la ho pasaporte, tanba pasaporte sira konfiska hosi ema ne’ebé kaptura sira.

Ezekutivu salienta katak, vítima sira hetan kona-ba natureza servisu nian no obriga atu hala’o fraude online iha kondisaun presaun físiku no psikolojiku. Tanba ne’e, nia subliña nesesidade atu asegura protesaun ba vítima sira no aplika prinsípiu la kastiga ema ne’ebé obriga atu halo krime.

Atu responde ba ameasa sira-ne’e, Governu Timor-Leste aprova ona Planu Nasionál Integradu atu Prevene no Kombate Rede Fraude Finanseira Dijitál Transnasionál ne’ebé Apoia hosi Plataforma Online Ilegal ba Fraude Online, Krime Sibernétiku Organizada no Tráfiku Ema 2026–2031.

Planu ne’e sei estabelese Sentru Nasionál ba Koordenasaun, Avaliasaun no Kombate Ameasa Transnasionál sira, ne’ebé sei halibur instituisaun relevante sira iha kuadru koordenasaun nasionál ida.

Timor-Leste mos sei haforsa kapasidade Polísia Nasionál Timor-Leste, Servisu Migrasaun no Unidade Intelijénsia Finanseira husi Banku Sentrál Timor-Leste. Medida sira inklui haforsa seguransa fronteira, forénsika dijitál no monitorizasaun tranzasaun finanseira suspeita, inklui utilizasaun ativu virtuais no plataforma pagamentu transfronteiriça sira.

Iha konferénsia ne’e, Timor-Leste propoin pilar asaun prioritáriu sira hanesan, aselera  asisténsia legál mútu no troka intelijénsia operasionál iha tempu reál, Haforsa kooperasaun finanseira atu rastreiu, blokeiu no konfiska osan ilícitu no ativu virtuais, Hametin parseria ho operadór telekomunikasaun, plataforma mídia sosial no kompanhia teknolojia atu identifika no hasai konta, website no mensajen fraudulenta no Asegura protesaun, asisténsia konsulár, repatriasaun seguru no la kastiga vítima sira ne’ebé obriga atu hala’o krime.

Ministru Interior mos reafirma Timor-Leste nia kompromisu atu koopera ho ASEANAPOL, INTERPOL, UNODC, Reinu Kamboja no nasaun sira seluk, hodi haforsa kooperasaun téknika, konsulár, judisiária no partilla informasaun.

Iha nia diskursu, Governante subliña katak erradikasaun fraude online presiza vontade polítika, solidariedade institusionál, koordenasaun entre estadu sira no implementasaun forte hosi sistema judisiáriu.

Nia afirma Timor-Leste, sei nafatin sai parseiru metin, fiável no komprometidu iha esforsu atu harii komunidade rejionál no globál ida ne’ebé seguru, reziliente no justu.

Introduz mós katak, Responde ba evolusaun krime siberiátiku ne’ebé transforma an ba dezafiu globál, Reinu Cambodia mak  sai hanesan uma-na’in ba  Konferénsia Intermasionál ba kombate Online Scams ICCOS ba tinan-2026 nian, ne’ebé hahú husi loron 23 to’o 24 Setembru, ofisálmente abertura husi Primeiru-Ministru Cambodia, Samdech Moha Borvor Thipadei Hun Manet. ho  nia tema “Acting Together towards Breaking the Chain and Eradication of Online Scams”

Konferénsia ne’e hetan ko-patrosíniu no apoiu boot husi Lancang-Mekang Integrated Law Enforcement and Security Cooperation Center (LMLECC), Nasoins Unidas nia Edifísiu kona-ba Droga no Krime ba Rejiaun Sudeste Aziatiku no Pasifiku (UNODC-ROSEAP), hamutuk ho Polísia Internasionál.#Buy