Dili, 07 fevereiru 2024 (SRP) – Programa Dezenvolvimentu Polísia Timor-Leste (sigla inglés;TLPDP) halo kolaborasaun ho Ministériu Interior, hamutuk ho Komandu Jerál Polísia Nasionál Timor-Leste (PNTL), hala’o semináriu ba daruak hodi koalia kona-ba oinsá bele eleva kuñesimentu motorista sira atu disiplina iha estrada publiku.
“Objetivu estratéjiku husi Planu Asaun ida-ne’e maka atu dezenvolve kampaña seguransa rodoviária, hodi eduka sidadaun sira respeita leis tránzitu inklui halo sensibilizasaun ba komunidade sira atu kumpri kódigu Estrada iha territóriu nasionál Timor-Leste tomak”, esplika Darren Booy, durante enkontru ne’e iha TLPDP Hudi Laran.
Nia dehan, TLPDP sei kontinua apoiu nafatin Ministériu Interior hodi dezenvolve kampaña seguransa rodoviária ba públiku sira no wainhira hetan ona aprovasaun finál maka sei hakat ona ba implementasaun iha tempu besik.
“Ami iha vontade tomak hodi apoiu siklu ne’e para reforsa ka dezenvolve modelu seguransa rodoviária nian. Tan ne’e publikasaun liuhosi media no panfletu sira ne’e tenke ho konsisténsia nune’e públiku sira bele komprende”, salienta.
Darren hateten, ba semana dahuluk sei servisu hamutuk hodi fó sai panfletu liuhosi mensajen badak ba komunidade sira, hafoin halo mós kampaña liuhosi relasaun publika hodi fó sai nafatin mensajen atu hasa’e kuñementu públiku nian inklui infratór sira.
“Panfletu sira ne’e bele sai hanesan alerta públiku, karik lakoi halo tuir aplika multa. Hau hatene katak atividade sira ne’e dalaruma halo ona maibé presija halo beibeik tanba neneik sei konsisténsia no muda ema nia mentalidade”, subliña.
Lideransa TLPDP ne’e rekuñese planu ida-ne’e importante tebes tanba iha ligasaun ho eduksaun no alerta ba komunidade em jeral, tanba ne’e presija iha asaun klaru.
“Konseitu ne’e dalaruma foun ba PNTL no Relasaun Publika maibé ida-ne’e simples no efetivu. Dala ruma ita haree ema para dupla iha estrada hodi kauza ba tráfiku no ema wain la preokupa maibé presija muda sira-nia mentalidade”, tenik tán.
Komandante Darren afirma, TLPDP bele apoia Tránzitu hodi sosializa kódigu estrada ao mesmo tempu halo sinerjia ho DNSR hodi halo revizaun no atualizasaun ba enkuadramentu legál sira, nune’e bele responde ba evolusaun tránzitu iha kapitál Dili ne’ebé dinámiku tebes, no-mós ajuda organiza motorista sira-nia komportamentu iha estrada públiku.
Entretantu enkontru ne’e hetan partisipasaun hosi Komandante Komandu Operasaun PNTL, Superintendente Xefi Polísia José Soares, Diretora Nasionál Seguransa Rodoviária (DNSR) Ministériu Interior Domingas Maia Barros, Komandante Tránzitu Nasionál, Komandante Tránzitu Munisípiu Díli, inklui asesór sira hosi TLPDP no-mós Ministériu Interior nian. # (Char/AX)
