Dili, 16 fevereiru 2024 (SRP)- Guvernu liu hosi Ministru Interior Francisco da Costa Guterres, Ph.D, ho apoiu hosi UN Woman, ohin iha Hotel Timor Dili, ofisialmente halo lansamentu ba Planu Asaun Nasional Rezolusaun Konsellu Seguransa Nasoins Unidas nian 1325 (PAN RKS 1325), kona-ba Feto, Pás no Seguransa iha faze daruak nian (2024-2028), hodi implementa iha Timor-Leste.
PAN 1325 ne’e sai hanesan estratéjia nasionál ida-ne’ebé integradu no envolve parte interesada oinoin hodi asegura katak igualdade jéneru no lideransa feto nian inkorpora iha aspetu hotu-hotu iha prevensaun no rezolusaun konflitu nian, harii pás no rekuperasaun husi pos-konflitu no-mos resposta umanitária nian iha Timor-Leste.
Ministru Interior, Francisco da Costa Guterres, Ph.D, iha okajiuan ne’e rekoñese katak papél fundamentál husi feto Timoroan sira iha harii pás no dezenvolvimentu sustentável, PAN 1325 (2024-2028) faze daruak nian hodi promove feto sira-nia partisipasaun tomak no lideransa ne’ebe signifikativu no igual iha pás no seguransa, no iha prevensaun no rezolusaun konflitu komunitáriu, resposta ba dezastre no umanitária, no habelar kontestu sira kona-ba feto sira-nia papel iha foti desizaun iha setór seguransa no justisa iha governasaun hotu-hotu.
Xefi UN Women iha Timor-Leste, Nishtha Satyam
Governante ne’e hatutan, PAN 1325 ne’ebe implementa iha Timor-Leste nia estruturadu iha pilár prinsipál haat mak hanesan Pilar Partisipasaun, Prevensaun, Protesaun no Harii Pás. Enkuantu PAN 1325 foun ne’e sei artikula estratéjia ida-ne’ebé kompriensivu hodi responde ba nesesidade evolusaun feto no labarik-feto sira-nian hodi responde ba risku ne’ebe sei mosu inklui impaktu dezastre ne’ebé kauza husi mudansa klimátika, seguransa sibernetika no-mos tráfiku umanu.
Entretantu, Xefi UN Women iha Timor-Leste, Nishtha Satyam, kongratula Governu Timor-Leste tanba aprova ona planu foun faze daruak nian. Entaun ida ne’e marka kompromisu ida atu hametin liután ajenda Feto, Pás no Seguransa iha nasaun ne’e. UN Women sei kontinua fó apoiu ba implementasaun no monitorizasaun ne’ebé efetivu ba PAN foun 1325 nian ne’ebé halibur hamutuk feto sira-nia partisipasaun no lideransa iha setór hotu-hotu iha governu no sosiedade.
Tuir nia, Timor-Leste halo ona progresu signifikativu hodi promove feto sira-nia partisipasaun no lideransa iha papel foti desizaun ina nivel nasionát no promove igualdade jeneru iha forsa seguransa nasional nia laran.
Nishtha Satyam, hatutan, ohin loron, Parlamentu Nasional (PN), Timor-Leste rasik lidera husi feto ida no 36.9% husi kadeira sira (24 husi 65) iha Parlamentu Nasional feto sira mak asume. Iha instituisaun F-FDTL (Falintil-Forsa Defeza Timor-Leste) foin talais ne’e halo mos nomeasaun postu kapitaun ba ofisiál feto dahuluk, ne’ebe marka progresu signifikativu iha reprezentasaun jéneru no lideransa iha militar laran.
Maski nune’e, ulun bot UN Woman ne’e rekuñese katak feto sira nafatin ladun reprezenta iha aspetu hotu-hotu iha nivel foti desizaun nian. tanba iha tinan 2023, iha deit 4% ne’ebe eleitu ba Xefe Suku no-mos reprezentante feto sira-nian iha instituisaun PNTL hamutuk 15%, ne’ebé la tuir alvu ne’ebé define ona iha Estratejia Jéneru 18% ba 2022 nian.
IX Governu, liu hosi Ministeriu Interior nia lideransa no koordenasaun, kontinua promove igualdade jéneru no direitu feto no labarik-feto sira-nian, tanba Timor-Leste esforsu hela hodi sustenta pás no aselera progresu dezenvolvimentu nian iha dekade rua nia laran hafoin restaurasaun independensia.
Rekorda fali katak iha loron 11 novembru 2021, iha komemorasaun aniversáriu ba da-21 RKSNU 1325, Ministeriu Interior no UN Women ofisialmente inaugura ona estrutura PAN 1325 ba planeamentu no dezenvolvimentu faze daruak husi enkuadramentu nasional Feto Pas no Seguransa nian. Dezenvolvimentu PAN 1325 faze daruak ne’e hanesan prosesu multi- interesada no partisipativu ne’ebé lidera husi Ministeriu Interior ho apoiu tekniku husi UN Women, hafoin hala’o semináriu konsultasaun no validasaun ho Ministeriu relevante sira, Sosiedade Sivil no parseiru dezenvolvimentu sira iha nivel nasional no munisipiu durante periodu 2021-2023. Konsultasaun ne’e mos envolve reprezentante sira husi grupu feto, feto rural sira, feto ho defisiensia sira, feto sobrevivente sira husi konflitu pasadu, ema ho defisiensia sira, no komunidade LGBTIQ +. Total instituisaun governu 15 no organizasaun sosiedade sivil 14 hetan konsulta no envolve iha dezenvolvimentu no elaborasaun PAN 1325 faze daruak nian.
Konsellu Ministrus rasik iha loron 10 janeiru tinan 2024 aprova ona PAN 1325 (2024-2028) no ida ne’e hatudu katak kompromisu boot husi Governu Timor-Leste atu halo planu, dezenvolve, implementa no investe iha avansa ninia ajenda nasional ba Feto, Pas no Seguransa iha kontestu pos-rekuperasaun COVID-19 no Timor-Leste ninia adezaun ba Association of Southeast Asian Nations (ASEAN).
Sesaun Abertura PAN-1325, Feto Paz no Seguransa
Your content goes here. Edit or remove this text inline or in the module Content settings. You can also style every aspect of this content in the module Design settings and even apply custom CSS to this text in the module Advanced settings.
Hafoin halo lansamentu ofisial, komisaun organizadora konvida partispante sira hotu hamriik hodi presta omenajen ba matebian nain tolu mak hanesan Sra. Vicenta Correia hosi UN Woman, Sra. Elsa Verdial hosi Ministeriu Edukasaun no-mos Sr. Martinho de Carvalho hosi Ministeriu Interior ne’ebe husik ona mundu ne’e. Pioneer nain tolu ne’e maka fo sira nia kontribuisaun ba setor seguransa liu-liu iha implementasaun PAN 1325 dahuluk nian iha area rezolusaun konflitu no “peace building” nian.
Partisipa iha lansamnetu ne’e envolve Vise-Ministra Asuntu ASEAN, Milena Maria da Costa Rangel, Sekretária Estadu ba Igualdade (SEI), Elvina Sousa Carvalho, Prezidente Autoridade Munisipiu Dili (PAMD), Guilhermina F. S. Ribeiro, Embaixada akreditadu sira iha Timor-Leste inklui pontu fokal jeneru hosi instituisaun Guvernu, PNTL no F-FDTL. (Oser/Izu/AX).
