Dili, 14 marsu 2024 (SRP) – Ministru Interior, Francisco da Costa Guterres, Ph.D, hetan vizita kortezia husi Amy Nishtha Satyam nudar Xefi UN Woman iha Timor-Leste ho ekipa hodi ko’alia kona-ba implementasaun Planu Asaun Nasionál ba Feto, Paz no Seguransa ba faze daruak nian iha Timor-Leste.
“Ohin ami ho ekipa elaboradór sira mai hasoru malu ho Exelensia Ministru Interior no ida-ne’e hanesan sorumutu dahuluk hafoin lansamentu Planu Asaun Nasionál Rezolussaun Konsellu Seguransa Nasoens Unidus (PAN-RKSNU) 1325, konaba Feto Paz no Seguransa faze daruak nian (2024-2028), hodi implementa iha Timor-Leste”, dehan Xefi UN Women, Nishtha Satyam, hafoin remata enkontru ne’e iha Ministeriu Interior, Vila-Verde, kinta (14/03/2024).
Tuir nia, impelementasaun no evaluasaun programa PAN 1325 ne’e rasik halo feto sai hanesan autor xave iha prosesu dame entaun ida ne’e marka kompromisu ida atu hametin liután ajenda Feto, Pás no Seguransa iha nasaun ne’e.
“UN Women nafatin iha komitmentu hodi ajuda Guvernu Timor-Leste liu hosi implementasaun no monitorizasaun ne’ebé efetivu ba PAN foun 1325 nian ne’ebé halibur hamutuk feto sira-nia partisipasaun no lideransa iha setór hotu-hotu liu-liu haforsa instituisaun governu no eduka sosiedade sira ba mudansa ne’ebé pozitivu” afirma.
Hatan ba ida-ne’e Ministru Interiór lori guvernu nia naran kongratula UN Woman nudar parseria Ministériu Interior nian no-mós ba ekipa elaboradór hotu ne’ebé mak envolve a’an iha dezenvolvimentu Planu daruak ne’e nian.
Iha okajiaun ne’e Ministru Francisco mós fó rekoñesimentu ba feto nia papel fundamentál iha prosesu konstrusaun estadu no nasaun hodi dezenvolve no hametin di’ak liután Planu Asaun Nasionál 1325 ba faze daruak ne’e tanba Governu nia kompromisu no komitmentu hodi kontinua haburas dezenvolvimentu responsivel ba jéneru, hodi bele kumpri mandatu no espíritu rezolusaun 1325, ne’ebé ofisialmente lansa ona iha loron 16 fevereiru 2024 iha Hotel Timor. # (Bui/Rival/AX).
