Dili, 07 Marsu 2024 (SRP) – Ministru Interior, Francisco da Costa Guterres, Ph.D, ofisalmente entrega ekipamentus hanesan Televizaun 13 kompleta ho parabola, motorizada inklui karreta, hodi apoiu servisu Komandu Unidade Patrullamentu Fronteira (UPF), halo servisu iha area fronterisa.
Ministru Francisco da Costa Guterres, hateten, hafoin halo vizita ba liña fronteira iha outubru tinan 2023, haree katak kondisaun balu iha fronteira la sufisiente ho nune’e governu presiza hadia infraestrutura sira hodi tau atensaun nune’e sira bele hala’o sira-nia servisu ho diak.
“Ita mós tenke tau atensaun ba kondisaun sira ne’e, se ita obriga sira hala’o servisu maibé laiha kondisaun mínimu ida hodi hala’o servisu, sira sei labele halo servisu ho másimu. Tanba ne’e ita hahú kria kondisaun ba sira nune’e bele halo kontrolu ba atividade ilegais iha fronteira”, dehan Francisco Guterres, ba jornalista sira iha Ministériu Interior, kinta (04/03/2024).
Tuir nia, servisu UPF presija tau atensaun tanba knar prinsipál UPF nian maka halo monitorizasaun ne’ebé seguru hodi hametin seguransa fronterisa entre Indonézia no Timor-Leste liu-liu halo prevensaun tráfiku ilegál iha liña fronteira nasaun rai rua nian.
“Hakarak apresia mós ba servisu Diresaun Nasionál Lojístika, Ministériu Interior nian, ne’ebé prepara ekipamentu sira ne’e, depois ida-ne’e, sei tau tan kondioens balun, ne’ebé sei hala’o iha tinan ida-ne’e nia laran inklui infraestrutura sira ho fazeadamente”, salienta.
Iha fatin hanesan Komandante UPF Euclides Belo, agradese ba Ministru Interior ne’ebé tinan kotuk hala’o vizita ba postu sira iha liña fronteira hodi identifika kondisaun sira ne’ebé mak UPF hasoru.
“UPF hala’o nia kna’ar ho nia moto katak, “Ha’u-nia sakrifisiu mak dedikasaun Estadu”, ho nune’e atu kore aan husi sakrifisiu sira ne’e, mak Ministériu Interior, hamutuk ho Komandu Jerál identifika nesesidade ne’ebé urjente ba UPF hodi garante seguransa iha liña fronteira”, dehan Euclides Belo.
“Sasán sira ne’e sei utiliza ba UPF, laos ba komadante UPF, tan ne’e atu klarifika katak, motorizada rua ne’e sei koloka tuir orientasaun Ministru nian, ba iha Companhia Charlie RAEOA, liu-liu Postu Cruz no Postu Citrana ne’ebé durante ne’e la’o ain to’o Naktuka hodi halo seguransa iha liña fronteira”, relata.
Komandante UPF ne’e subliña, transporte ne’ebé mak fó, sei fó apoiu mós iha unidade sira, nune’e membru sira labele kestiona iha área seguransa, no halo apoiu koordenasaun ho TNI, POLRI, no autoridade relevante sira iha Liña Fronteira, hodi halo movimentu hodi asegura seguransa no ekipamentu hirak ne’e sei hato’o ba komandu, hodi alista hanesan patrimoniu PNTL nian. #Buy/Charlie/Met/Riv.
