Dili, 12 abril 2024 (SRP) – Hafoin Ró funu Militár Japaun nian JS Murasame atraka iha Portu Dili hodi halo vizita portuariu iha loron sesta ne’e, Ministru Interior, Francisco da Costa Guterres, Ph.D, hetan konvite hodi halo vizita honorariu ho objetivu atu bele hametin liutan lasu amizade no diplomasia entre nasaun rua ne’e, iha area marítima nian iha futuru.
Iha biban ne’e Prezidente Repúblika, Dr Jose Ramos Horta, apoia polítika externa Governu nian, hato’o bemvindu ba vizita ida-ne’e tanba Timor-Leste agora iha faze promove estabilidade rejionál no ko-operasaun. Tanba ne’e nasaun rua ne’e presija tebes hametin instituisaun sira ne’ebé vokasionadu apoiu ba Pás, hodi iha kbiit atu kopera ba malu tanba mehi Timor-Leste mak hakarak konkista paz no estabilidade iha rejiaun no mundu.
Iha fatin hanesan Embaixadór Japaun iha Timor-Leste, Tetsuya Kimura, agradese ba Governu Timor-Leste ne’ebė simu ona ró MURASAME no vizita ne’e bele hametin liután relasaun entre nasaun rua tanba Japaun ho Timor-Leste iha ona relasaun diplomátika liu tinan 20-resin durante restaurasaun independénsia, iha loron 20 fulan maiu 2002 liu ba.
Entretantu Ró funu JS MURASAME hosi Japaun ne’e sei vizita Timor-Leste durante loron tolu nia laran hahú ohin 12 to’o loron 14 abril. Enkuantu Ró ne’e akompaña direta hosi Komandante Divizaun eskoltu ida, Forsa Marítima Defesa hosi Japaun, Kapitaun Kawano Kohiniko hamutuk ho forsa marítima japonés hamutuk ema na’in 241. #AX
