Dili, 12 maiu 2024 (SRP) – Membru PNTL hamutuk 56 hosi Komandu Munisípiu Aileu, Ainaro no Covalima, entrega hikas atributu organizasaun arte marsiais ba Governu hodi servi de’it povu no Estadu.
Ministru Interior, Francisco da Costa Guterres, lori governu nia naran kongratula membru PNTL Munisípiu tolu tanba bele haketak an ona hosi GAR no GAR hodi serve de’it estadu.
“Hau lori Governu nia naran, apresia no kongratula membru polísia sira ne’ebé mai hamrik iha ne’e, tanba imi hakarak hatudu ba públiku katak, imi ho imi-nia vontade rasik hakarak servi estadu ida-ne’e. Imi hatudu komprimisiu ida de’it, hakarak servi rai no povu ida-ne’e. Tanba papel importante PNTL nian mak lori estabilidade ba rai ida-ne’e, hametin Seguransa hodi nune’e dezenvolvimentu bele la’o iha rai ida-ne’e”, dehan Ministru Francisco Guterres, perante nia diskursu iha Suku Casa, Postu-Administrativu Ainaro, Munisípiu Ainaro, (11/05/2024).
Tuir nia, pratika Arte Marsias laos buat at ida, maibé iha grupu balun maka uza sala hodi estraga tiha estatutu no balu uza fali ba interese pessoal.
“Ohin imi mai iha ne’e hodi desvinkula imi-nia an husi arte marsias, katak imi sei lá pertense ba grupu ida, maibé pertense ba estadu, povu no nasaun RDTL. Governu mós sei la husik polísia sira ne’ebé uza sala arte marsiais ba sira-nia interrese. Tanba ne’e imi tenke hamrik iha klaran hodi defende rai no estadu ida-ne’e”, afirma.
Ezekutivu ne’e mós husu atu membru sira halo sira-nia papel hodi kontrola fatin treinadu sira ne’ebé mak iha no labele treinu subar, nune bele kontribui ba nasaun ida-ne’e.
“Tanba imi sira ne’ebé ohin entrega atributu ne’e hahú Ohin ba oin, imi laos pertense ona ba Grupu Arte Marsiais, nune bele ajuda hadia probelema sira ne’ebé akontese no halo dezenvolvimentu ba nasaun ida-ne’e” tenik tan.
Biban ne’e Ministru mós alerta ba komandu atu orienta membru sira obedese ba regra sira no regulamentu sira iha estatutu ne’ebé mak lei atribui.
“Ha’u husu ba PNTL sira hotu, Mantein firme, hanesan membru PNTL ida loyal nafatin ba estadu, labele depende tanba polítika sese deit, depende deit ba imi nia prestasaun servisu, lealdade deit ba estadu no servisu ho profisionalizmu”, fundamenta.
Antes remata, governante ne’e mós husu nafatin ba komandu hodi identifika membru PNTL sira ne’ebé sei inklui an iha arte marsiais.
“Tempu sei iha nafatin hodi bele deklara sira-nia an no entrega sira- nia atributu tanba Governu sei la tolera aktu sira hanesan ne’e. Se wainhira tempu ne’e liu ona mak hetan membru PNTL sei inklina an iha arte marsias mak ninia opsaun mak ida deit, sai husi polísia”, alerta.
Entretantu, Prezidente Autoridade Munisípiu Ainaro, Manuela Georgina Carmo Bucar Corte Real, konsidera seremónia ne’e hanesan eroi foun hodi deklara an ba publiku.
“Seremónia solene intrega atributu hosi komandu PNTL Ainaro, Aileu no Covalima ba governu no estadu RDTL ne’e bele konsidera hanesan aktu patriotizmu tamba imi disidi hodi presta deit imi-nia dedikasaun profesionál ba instituisan PNTL hodi servi de’it Povu no Nasaun. Ohin imi jura ba RDTL katak imi sei presta lealdade totál ba deit ita-nia Repúblika ida-ne’e no hau agradese ba ida-ne’e”, dehan PAM Ainaro ne’e.
Iha okajiaun ne’e nia mós husu Ministru Interior komandu PNTL no Ministru Juventude, Desportu, Arte no Kultura (MJDAK) atu servisu hamutuk konsolida paz no estabilidade hodi fó biban ba implementasaun polítika desentralizasaun ho di’ak iha Munisípiu Ainaro.
“Aproveita oportunidade hau reprezenta povu no Autoridade Munisípiu Ainaro hakarak sujere ba nai Ministru sira atu kolabora hodi intensifika programa juvenil no desportu tanba ami prontu atu koopera hodi organiza programa hanesan Jambore Juvenil Estudantil foka ba programa reflorestasaun, noite kultural, Kadi-kakutak, formasaun Lideransa, public Speaking, ordem unidas, sívika patriota, inklui kompetisaun desportu modalidade Basket, Volleyball no Atletismu, hodi evita fó fali espasu ba aktividades ne’ebé la kontribui ba progresu sosiedade nian”, sujere PAM Manuela.
Iha fatin hanesan, Komandante Komandu PNTL Munisípiu Ainaro, Superintendente Polísia Luis da Silva, hateten nia parte sei halo knar bazeia ba lei no ordem.
“Ohin loron importante ba munisípiu Aileu, Ainaro no Covalima ba referensia enkudramentu legál ho halo desvinkulasaun ba membru sira ne’ebé envolve iha GAM no GAR. Durante tinan barak ona sempre kestiona kona-ba neutralidade no imparsialidade atuasaun iha terenu, relasiona ho konflitus ne’ebé lori GAM ho GAR iha territóriu Timor-Leste. Ohin sira mai afirma sira-nia aan ba dala rua, ba dahuluk halao tiha ona, ohin kompromete entrega tán atributu GAM no GAR hodi hakotu relasaun ho GAM no GAR hodi kumpri no hakruk deit ba lei no ordem no hala’o misaun konstituisaun RDTL artigu 147, 8′ 1 no 2”, dehan Komandante Luis.
Nia hateten, atu kria situasaun hakmatek presija tebes kolaborasaun hosi entidades hotu hahú kedas hosi autoridade lokál sira husi aldeia, suku, postu to’o munisípiu inklui igreja no veteranu sira.
Serimónia ne’e konta ho prezensa hosi Komandante Jerál PNTL, Komisáriu Jerál, Henrique da Costa, Prezidente KRAM Octaviano da Conceição, Komadante Komandu PNTL Aileu, Supertendente Sebastião Alves Quintão, Komdante Komandu PNTL Covalima, Supertendente Calisto Gonzaga, Lider relijioju, Konsellu Veteranus, Autoridade Lokál no Konsellu Suku, joventude sira inklui estudante sira hosi Eskola Katólika Santa Maria Ainaro (SAMARIA) ne’ebé halo animasaun liu hosi drum band. #SRP
