Dili, 06 setembru 2023 (SRP) – Guvernadór Lembaga Ketahanan Nasionál Republik Indonézia (LEMHANNAS), Andi Widjajanto, hamutuk ho delegasaun halo vizita badak hodi hasoru malu ho Ministru Interior em ezersísiu atuál Sekretáriu Estadu Protesaun Sivíl (SEPS), Domingos Mariano Reis, hodi fortalese kooperasaun servisu liuhosi formasaun iha area seguransa interna nian.
“Ohin ita simu vizita hosi Governadór ho nia delagasaun sira no ita ko’alia liu kona-ba hametin kooperasaun bilaterál entre Timor-Leste no Indonézia, em termos kapasitasaun ba lideransa Polísia Nasionál Timor-Leste (PNTL) ninian, liu-liu formasaun ba postu jenerais sira ao mesmo tempu hodi halo estudu komparativu husi Indonézia mai Timor-Leste iha instituisaun tutela Ministériu Interior”, hateten Domingos Mariano Reis, ba jornalista sira hafoin remata enkontru ne’e iha sala Migrasaun Ministériu Interior, Vila-Verde, kuarta (06/09/2023).
Nia dehan, LEMHANNAS hanesan instituisaun ida ne’ebé bele fó formasaun ho konseitu Jeopolítiku Jeostratejiku iha doutrina Reziliénsia Nasionál no Sistema Jestaun iha ámbitu dezenvolvimentu nasionál nian.
“Entertantu ita ko’alia mós kona-ba hametin kooperasaun entre nasaun rua ba iha promosaun mitigasaun hodi responde ba ameasa La-Nina (udan bot) ne’ebé kauza ba risku dezastre sira hanesan inundasaun no rai halai inklui fenomena El-Nino (bailoro naruk), ne’ebé fó impaktu bo’ot ba iha produsaun alimentar”, salienta.
Governadór LEMHANNAS ho ekipa inklui estrutura MI salaun enkontru Servisu Migrasaun.
Governante ne’e hatutan, ho kooperasaun hirak ne’e nia parte iha ona estratéjia ba preparasaun sustentável hodi aumenta reziliénsia komunidade vulneravel iha territóriu tomak wainhira mosu dezastre naturais.
Entretantu Governadór Andi Widjajanto, hateten vizita ida-ne’e nia parte lori mós péritu sira hodi hatene kle’an kona-ba polítika hosi Ministériu Interior nian iha area seguransa.
“Ami-nia vizita ne’e envolve dosente sira hodi hatene papel Ministériu Interior nian, no-mós kooperasaun iha formasaun lideransa rekursu umanu ba dezenvolvimentu nasaun nian”, relata Governadór ne.
“Ami mós deskute kona-ba polítika Timor-Leste nian ba redusaun populasaun liuliu ba iha persepsaun kona-ba Planeamentu Familiár hodi halo sensibilizasaun liuhosi edukasaun saúde”, subliña.
Governadór LEMHANNAS ne’e hatutan, hosi instituisaun ida-ne’e hamosu ona kuadru lideransa potensiál no profisionál iha área peskiza nian iha konseitu sira polítika administrasaun estadu nian.
Iha vizita ne’e delegasaun hosi Indonézia ne’ebé akompaña Governadór LEMHANNAS maka dosente sira ho postu jenerais hosi TNI no POLRI, adidu defeza hosi KBRI enkuantu akompaña SEPS maka eis jenerais PNTL, ne’ebé antes ne’e frekuenta ona programa Estudu (PPSA) klase 24 LEMHANNAS iha Indonézia, hamutuk ho asesór lokál no internasionais. # (Bui, Fatinha, AX)
