KOMANDU PNTL PRONTU FÓ APOIU BA FESTIVÁL KULTURÁL FRONTEIRA 2023

ili, 23 Outubru 2023, (SRP) – Segunda feira ne’e, Ministru Interior, Francisco da Costa Guterres,Ph.D, hamutuk ho Sekretáriu Estadu Protesaun Sivíl, Domingos Mariano Reis no-mós Komandante Jerál PNTL, Komisáriu Jerál Henrique da Costa, simu vizita hosi Sekretáriu Estadu Arte no Kultura, Jorge Soares Cristovão, ho komitiva, iha eskritoriu ofisiál Ministériu Interior, Vila-Verde.

Objetivu hosi sorumutuk ne’e hodi halo koordenasaun ba parte seguransa no servisu Imigrasaun nian, hodi apoiu Festivál Fronteira 2023 liuhosi interkambiu Kulturál hodi promove rekonsiliasaun ne’ebé sei realiza durante fulan novembru nia laran iha Munisípiu Bobonaro.

Atividade ne’e mós halo hodi hametin nafatin lasu amizade entre Timor-Leste no Indonézia ne’ebé sai nu’udar instrumentu pas nasaun rua nian.

Durante enkontru, bazeia ba rekomendasaun sira husi relatóriu Sentru Chega! no CVA, Ministru Interior Francisco Guterres, apresia tebes ho programa Festival Fronteira 2023 no Ministru orienta ona Komandu Jerál no Servisu Migrasaun atu fó apoiu totál ba atividade refere.

Enkontru ne’e mós hetan partisipasaun hosi Diretór Jerál Servisu Migrasaun, Inspetora Xefi Polísia, Adelaide da Rosa, Diretor Ezekutivu Sentru Nasionál Chega, IP, Hugo Maria Fernandes, hamutuk ho nia membru steering committee ba festiva refere. # (Bui/Elisa).