RAEOA, 14 outubru 2023 (SRP) – Ministru Interior, (MI), Francisco da Costa Guterres, Ph.D, akompaña hosi Komandante Komandu Administrasaun PNTL Superintendente Xefi Polísia, Natercia Martins, hamutuk ho ekipa tékniku sira halo vizita ba Postu UPF (Unidade Patrullamentu Fronteira) no hasoru malu ho autoridade lokál, lia nain no komunidade sira iha Sub-Rejiaun Pante Makasar, Rejiaun Administrativu Espesiál Oe-Cusse Ambeno – RAEOA).
“Ohin hau hamutuk ho ekipa mai iha ne’e hodi buka hatene kona-ba progresu servisu no dezafiu ne’ebé membru UPF sira hasoru nune’e hau nia tékniku sira sei aponta atu ami buka solusaun ba problemas ne’e”, hateten Ministru Interior, Francisco Guterres, wainhira halo vizita servisu ba Postu UPF Kaun, ne’ebé lokaliza iha Suku Naimeko, Sub-Rejiaun Pante Makasar.
Nia dehan, vizita ida-ne e tuir orientasaun Primeiru Ministru nian para hadia PNTL no halo tuir politika Governu nian hodi buka solusaun ba problema ne’ebé maka Instituisaun PNTL hasoru iha rejiaun ida-ne’e inklui postu fronterisa tomak.
“Postu foun ida-ne’e ita sei halo mudansa hodi kompleta nesesidade báziku sira hanesan mobiliariu, bee moos, ahi, halo moru haleu no sei instala tore vizilánsia hodi tau matan ba ita-nia fronteira”, subliña.
Goverante ne’e hatutan, durante vizita, nia observa direta kondisaun infraestrutura iha problema balu iha area lojístika nian tanba ne’e nesesidade tebes atu tau mós prioridade nune’e bele buka solusaun ba problemas hirak ne’e.
Iha fatin hanesan, autoridade lokál Antonio Colo, nudar mos Xefi Aldeia Noke, agradese ba Guvernu tanba ho postu UPF ne’e bele lori dezenvolvimentu ba iha nia suku laran.
“Ami-nia fatin ne’e laiha estrada no dok tebes hosi postu Leolbatan no Bobometo tanba ne’e ami komunidade kontente no agradese ba Guvernu sentrál tanba bele iha hanoin ne’ebé diak lori dezenvolvimentu mai iha Suku laran, maibe sebele karik hadia ami nia estrada halo diak hodi ami bele buka moris”, dehan Autoridade lokál ne’e.
Tuir nia, Kaun sai mós fatin ba movimentu ilegál tanba baliza kedas ho Kefa ne’ebé faz parte ba area Indonézia nian.
“Fatin ida-ne’e fronteira kedas ho mota Baukulu, Desa Banai no Desa Napan area Kefa nian ne’ebé uluk sempre akontese movimentu ilegál tama no sai barak liuhosi fatin ida naran Ka’un ne’e”, Afirma Antonio Colo.
Hafoin remata vizita Postu Kaun, ekipa kontinua halo vizita ba Postu UPF Leolbatan ne’ebé kondisaun grave tebes, nune’e nia orienta ona tékniku sira atu halo konstrusaun foun tuir pakote ne’ebé dezeña ona.
Biban ne’e, ekipa mos vizita Postu UPF Nipani hodi observa katak infraestrutura no ekipamentu servisu balu kondisaun la funsiona ho diak no antigu ona nune’e sei halo rehabilitasaun totál hodi kompleta mos ho tore vizilánsia, karteiras no ekipamentu apoiu seluk tán.
Vizita ne’e hetan akaompañamentu hosi Komandante Komandu PNTL RAEOA Superintendente polisia Nicolau Francelino da Costa, Komandante UPF Interinu, Superintendente Asistente Polisia, Carlos Moniz Maia, Diretor Nasionál Aprovizionamentu, João da Cruz, Xefi IT PNTL, Inspetor Xefi Polisia Deklino C. Marcal no-mos ekipa tékniku sira hosi Ministériu Interior nian. # (Bui, Oscar, AX).
