Dili, 09 fevereiru 2024 (SRP) – Enviadu espesiál hosi Sekretariu-Jerál Organizasaun Nasoins Unidas (ONU), nian ba asuntu Seguransa Rodoviária, Jean Todt, hamutuk ho komitiva, halo vizita badak ida hodi hasoru malu ho Ministru Interior, Francisco da Costa Guterres, Ph.D, hodi koalia kona-ba polítika Guvernu nian iha area seguransa rodoviária.
“Ida-ne’e hanesan hau-nia vizita ofisiál mai Timor-Leste no hetan oportunidade hasoru malu ho Ministru Interior hodi fó konsellu iha area seguransa rodoviária nian, no-mós hakarak hatene lala’ok no esforsu servisu Governu nian oinsá atu elabora kódigu Estrada timor nian”, dehan Jean Todt, hafoin remata enkontru ne’e iha Ministériu Interior, Vila-Verde, sesta ne’e.
Nia hateten, vizita ida-ne’e hetan konvite hosi Prezidente Repúblika, ho objetivu mak atu hasa’e kuñesimentu internasionál kona-ba seguransa estrada no kontribui atu hamenus númeru vítima tráfiku.
“Hau kontente tebes mai iha ne’e hodi hasoru malu ona ho Ministru Transporte no Komunikasaun, Ministra Saúde no ohin ho Ministru interior ne’ebé partilla mai ami kona-ba esforsu guvernu nian hodi asegura seguransa iha rai laran tanba iha rejiaun Ázia Pasífiku ne’e ema barak mate iha Estrada tanba la kuidadu an”, salienta.
Tuir nia, Governu liuhusi ministériu relevante sira sei hala’o sira-nia responsabilidade atu avalia natureza tomak husi problema jestaun seguransa estrada nian, nune’e bele hamenus númeru asidente sira ne’ebé kauza ba ema kanek no mate.
Iha biban ne’e Ministru Interior, Francisco Guterres, lori guvernu nia naran agradese ba tulun hosi enviadu espesiál ONU ne’e no hein katak iha futuru bele kontinua nafatin relasaun di’ak iha área seguransa nian.
“Hakarak agradese enviadu espesiál ho komitiva ne’ebé mai atu fó asesoria kona-ba seguransa estrada nian. Hanesan nasaun foun ami nafatin hakarak aprende no hetan rekomendansaun ho nasaun dezenvolvidu sira, tanba daudaun ne’e ami elabora ona enkuadramentu legál atu haree ba regra sira hodi kontempla iha kódigu estrada foun
nune’e bele salva vida umana iha nasaun ida-ne’e”, esplika Ministru Francisco.
Governante ne’e dehan, Ministériu Interior mós iha responsabilidade interligadu ho Ministériu Transporte no Ministériu Obras Públikas oinsá atu kontribui hamenus númeru mate no kanek grave sira ne’ebé rezulta husi akontesimentu tráfiku estrada nian. # (Bui/AX).
