DILI, 17 agostu 2023 (SRP)- Ministru Interior, Francisco da Costa, Ph.D, hasoru malu ho Embaixadora Timor-Leste ba Austrália, Inês Almeida akompaña husi Adidu Seguransa, Superintendente Xefe, Hermenegildo Gonçalves Alves, iha Gabinete Ministru Interior Vila-Verde.
Objetivu husi sorumutuk ne’e hodi kumprimenta ministru ba knaar foun no-mós ko’alia kona-ba Kooperasaun Servsiu ne’ebé hala’o ona ho governu Austrália entermus kapasitasaun ba rekursus umanus iha area seguransa no investigasaun.
Iha biban ne’e, diplomata timor oan ne’e, akresenta katak embaixada Timor-Leste servisu hamutuk ho Adidu Seguransa, mai komprimenta Ministru liga ba kooperasaun servisu sira ne’ebé lao hela.
“Iha Austrália, ita iha ita-nia adidu seguransa ne’ebé destakadu iha ne’eba, komandante Hemernegildo, ohin ami mai kumprimenta Ministru, ha’u mós nudar embaixadora, ami mai hodi haree saida loos maka ita bele halo entermus kooperasaun ho Austrália, ami koalia kona-ba oinsá fó treinamentu ba rekursus umanus liu-liu ba lideransa sira iha Polísia Nasionál Timor-Leste (PNTL), tenik diplomata ne’e hafoin hasoru malu ho Ministru Interior.
Iha biban ne’e, Ministru Interior mós rekoñese katak governu Austrália liuhusi Programa Dezenvolvimentu Polísia Timor-Leste (sigla inglés; TLPDP) mós oferese apoiu ba PNTL liuhusi treinamentu ba rekursus umanus hasa’e kapasidade iha area oin-oin, informa embaixadora Timor-Leste ba Austrália.
Foto : Abuy
Autor : Liza
