Dili, 24 maiu 2024 (SRP) – Ekipa konjunta servisu sekreta kompostu hosi Araña Leste, Araña Oeste junta FP (Forsa Polisia), asegura ona joven mane nain-7 ne’ebé envolve krime jerál ba kazu asaltu no naok telfone hodi rezulta vitima inan ho oan hetan asidente mortal ne’ebe akontese iha area Praia dos Coqueiros, loron Tersa-Feira, 21 maiu 2024, horas 21h45.otl.
Kazu ne’e inisia hosi grupu ho naran Rabat Kesi (RK) utiliza motor tolu kompostu husi ema na’in-6, halo asaltu ba vitima hodi hadau telefone to’o vitima ho nia oan desidi duni tuir maibe suspeitu sira kaer ai-tonka halo asaun bandalizmu hodi rezulta motor ne’e baku fila no inan doben ho oan hetan pankada makas ho nia oan doben evakua ba iha ospital HNGV maibé la konsege salva no hakotu ona nia vida.
Ho akontesementu ne’e, iha loron tuir mai, Xefi SIPN (Servisu Informasaun Polisia Nasional), hatun kedas diretiva urjente ba ekipa konjunta buka tuir suspeitu sira liu hosi rede intelijensia nian hodi rekolla uluk kámara vizilansia, hafoin halo kedas surveilensia ba fatin hirak ne’ebe deskonfia sai baze sirkulasaun makaas no konsege duni tuir grupu RK maibe sira halai tama komunidade nia uma no soe hela motor tolu inklui evidensia ropa iha bagajem motor laran.
Hosi ropa no motor tolu ne’e ekipa servisu halo kedas vizilansia total hodi kontatu ho fontes akreditadu atu espalla fotografia inklui elabora planu operasaun tuir kapasidade intelijensia nian atu identifika kualker ema ne’ebe halo asaun naok sasan sira hanesan telefone no halo aktu krime seluk iha momentu saida deit. Ho planu hirak ne’e maka iha loron tuir mai ekipa servisu konsege asegura suspeitu sira iha area ne’ebe lahanesan inklui evidensia hotu to hetan menus hosi 24h.
Rekorda fali katak, suspeitu hirak ne’e komete bebeik kazu naok inklui asaltu, hanesan suspeitu estudante mane ida ho naran BCB, Alias MA hetan prizaun preventiva fulan tolu, tanba naok motor iha portu Dili, foin sai komarka kontinua halo asaltu. Suspeitu YGCS alias EB komete kazu naok no prosesu sei iha hela tribunal. Suspeitu JS alias AS no suspeitu prinsipal AIS alias OG, komete bebeik kazu naok tanba idade kiik la tama komarka maibe nafatin kontinua nia atividade rutina hodi asaltu ema to’o vitima ida mate.
Hafoin halo identifikasaun ekipa servisu kontatu kedas ba DIKN (Departementu Investigasaun Kriminál Nasional) mai foti suspeitu sira inklui evidensia hodi kontinua halo prosesu investigasaun antes submete ba tribunál hodi tuir julgamentu. #SRP
