Dili, 15 fevereiru 2024 (SRP) – Ministru Interior, Francisco da Costa Guterres, Ph.D, hamutuk ho Sekretariu Estadu Protesaun Sivil, Domingos Mariano Reis, simu vizita ofisial hosi reprezentante povu iha uma fukun Parlamentu Nasionál liu hosi Komisaun B ne’ebe trata asuntu Negósiu Estranjeiru, Defeza no Seguransa Nasional, hodi koalia kona-ba asuntu seguransa interna liu-liu migrasaun, kontrolu fronteira, protesaun sivil no kooperasaun polísial.
Prezidente Komisaun B Parlamentu Nasionál (PN), Domingos Augusto”Deker”, hateten objetivu hosi enkontru ne’e hodi halo diskusaun no analiza kona-ba situasaun nune’e bele iha rekomendasaun ruma hodi implementa Planu Estratéjiku Seguransa Interna 2030 nian.
“Vizita kortezia ida ne’e bazeia ba ami nia planu ne’ebe maka iha ona no konsiente katak ita foin tama iha fulan inisiu no ami hanesan komisaun ne’ebe tau matan ba area Negosiu Estranjeiru, Defeza no Seguransa, ami iha obrigasaun atu aprosima hodi hato’o ami nia lia menon ruma nune’e ejekusaun ba planu no atividade sira ne’ebe inklui iha OJE 2024 bele la’o ho diak nune’e ami mos bele akompaña hodi halo fiskalizasaun iha futuru”, esplika Prezidente Komisaun B Domingos “Deker”, hafoin remata enkontru ne’e iha Ministeriu Interior, Vila-Verde, kinta (15/02/2024).
Tuir nia, asuntu seguransa sai fatór importante hodi dezenvolve setór seguransa tanba ne’e presija komplementa no tau atensaun di’ak hodi dezenvolve infraestrutura no kompleta fasilidades ne’ebé adekuadu.
Iha oportunidade ne’e, tekniku sira hosi Ministeriu Interior mos aprezenta planu ezekusaun hosi Ministériu Interior, PNTL, Servisu Migrasaun no-mós planu prioridade ne’ebé mak atu implementa iha tinan 2024 inklui atualizasaun progresu preparasaun projetu infraestrutura Postu, Eskuadra no Kuartel PNTL nian.
Asuntu sentral seluk ne’ebe koalia iha enkontru ne’e maka parte rua tau hamutuk hanoin hodi halo diskusaun no analiza kona-ba preparasaun Estadu no Igreja Katolika atu simu vizita ofisiál Papa Fransisco iha fulan agostu, nune’e bele hetan rekomendasaun ruma hodi garante seguransa no estabilidade ba povu rai ida ne’e. #(Oser/Met/AX) Download
