Dili, 30 janeiru 2024 (SRP) – Ministru ba Dezenvolvimentu Internasionál no Pasífiku, Ministru ba Defeza Indústria, Onorável Pat Conroy MP Austrália nian hamutuk ho delegasaun halo vizita ofisiál hodi hasoru malu ho Ministru Interior Francisco da Costa Guterres. Ph.D, hodi koalia kona-ba kooperasaun servisu iha area seguransa fronteira.
“Ami enkontru ohin, hamutuk ho Ministru Austrália, hodi haree hamutuk servisu no kontinua mantein Seguransa ba iha Fronteira nomós sei servisu hamutuk ho Austrália, dehan Francisco da Costa Guterres, PhD, ba jornalista sira, hafoin remata reuniaun ho Ministru Pat Conroy ho nia delegasaun iha sala reuniaun Gabinete-MI,30/01/2024.
Governante ne’e, agradese ba governu Austrália durante ne’e suporta governu Timor-Leste, liuhosi programa TLPDP, oinsá hametin no konsolida Polísia sira-nia servisu ho di’ak liután.
MI esklarese tan katak, Governu Austrália mós durante ne’e apoiu servisu Migrasaun nian, liuhosi IOM sistema Midas, no sei iha buat barak ne’ebé sira sei apoiu.
Ministru Interior akompaña husi Sekretariu Estadu Protesaun Sivíl inklui Komandante Jerál PNTL
“Ami mós halo diskusaun no aborda asuntu prinsipál balun kona-ba apoiu ne’ebé mak sira fó, nune’e hodi bele fó impaktu pozitivu ba dezenvolvimentu Seguransa iha ita-nia rai ”, nia informa.
Aleinde ida-ne’e, governante IX Governu Konstitusionál ne’e salienta liután, em prinsípiu diskusaun ne’e tenke la’o nafatin, fokus mós ba investigasaun kriminál, tanba sira apoiu no estabelese hela laboratóriu Nasionál. Governu Austrália mós sei apoiu no fasilita formasaun treinu lideransa nian ba iha Polísia komunitária, no kestoens administrasaun nian balun.
Iha fatin hanesan, Ministru Conroy aprezenta programa foun ida hodi fó apoiu ba traballadór Timor-oan sira ne’ebé partisipa iha Eskema Mobilidade Traballu Pasífiku Austrália (PALM), ne’ebé parseria ho Governu Timor-Leste hodi apoiu tokon $4 ba apoiu sosiál no reintegra adisionál hodi maximiza benefisiu sira ne’ebé sei kontinua ba partisipasaun traballadór Timor-oan sira nian iha eskema PALM.
Programa PALM ne’e rasik fornese empregu, oportunidade no rendimentu ba Timor-Leste nia traballadór sira, maiz ou menus traballadór Timor-oan hamutuk ema 4500 mak oras ne’e servisu hela iha Austrália, iha eskema PALM nian, ho remisaun sira daudaun ne’e, sai hanesan kontribuisaun segundu boot liu ba Timor-Leste nia Produtu Doméstiku Bruto nian hafoin mina-rai no gás.
Ministru Conroy mós anúnsia ona tokon $1.58 hodi ajuda Timor-Leste prepara no responde ba impaktu hosi El Niño. Ida-ne’e parte husi pakote apoiu millaun $5 ne’ebé fornese ba Timor-Leste no Pasífiku.
Guvernu Austrália mós iha komitmentu boot kontinua ajuda no sai nu’udar parseiru dezenvolvimentu no seguransa boot liu – no sei kontribui ba estimativa milhoens $118 iha asisténsia dezenvolvimentu iha tinan 2023-2024.
Iha enkontru ne’e Ministru Interior, hato’o apresiasaun ba Guvernu Austrália ligadu ho kooperasaun bilaterál nian durante née no-mós apoiu sira ne’ebé mak diriji liubá Ministériu Interior nia devizaun sira hanesan Sekretaria Estadu Protesaun Sivíl (SEPS), PNTL (Polísia Nasionál Timor-Leste), no-mós Diresaun Jerál Servisu Migrasaun inklui kontinuasaun parseria ba dezenvolvimentu umanu futuru.
Delegasaun hosi Austrália ne’e envolve, Embaixadora Austrália iha Timor-Leste Caitlin Wilson, Nigel Bruce, nu’udar asesór seniór ba Ministru Conroy, Marcus Lumb, Assistent Sekretaria hosi DFAT nian, Segundu Komandante TLPDP Dominic Zappavigna no-mós segundu sekretaria hosi embaixáda Austrália Rachael Ratican.
Enkuantu Ministru Interior hetan akompañamentu hosi Sekretariu Estadu Protesaun Sivíl, Domingos Mariano Reis, Komandante Jerál PNTL, Komisáriu Jerál Henrique da Costa, Segundu Komandante Jerál PNTL Komisáriu Polísia Pedro Belo, Diretór Jerál Servisu Migrasaun Inspetór Xefi Polísia Adelaide da Rosa. # Ekipa SRP-MI
