Dili, 23 Outubru 2023, (SRP) – Governu Austrália liuhosi Programa Dezenvolvimentu Polísia Timor-Leste (TLPDP-sigla Ingles), entrega ekipamentu robot ho teknolojia modernu hodi fasilita servisu Polísia Nasionál Timor-Leste (PNTL).
Ministru Interior, Francisco da Costa Guterres, Ph.D, hateten ekipamentu robot ne’e apoiu hosi Guvernu Australia liu hosi TLPDP ba UEP hodi moderniza instituisaun PNTL.
“Hau lori Guvernu nia naran hakarak agradese ba Guvernu Australia liu hosi TLPDP tanba ajuda oferese robot no-mos formasaun ba membru sira atu ajuda ita nia polisia halao servisu diak liu no garante seguransa wainhira deteta kestoens balu ligadu ho material explozivu sira”, esplika Francisco Guterres, wainhira halo abertura no diskursu ofisial iha instalasaun kuartel UEP, Bairro-apite, Segunda-feira ne’e.
Tuir nia, Robot ne’e atu fasilita Unidade Espesiál Polísia (UEP) liuliu servisu ekipa Explosive Ordinance Disposal (EOD) atu bele harahun bomba ka materiál esplozivu ruma ne’ebé atu fó risku bá ema nia vida.
“Apoia ida ne’e hatudu katak Governu Australia hanesan nasaun amigu iha komitmentu hodi apoia PNTL nia dezenvolvimentu liu husi parseria ho TLPDP ne’ebe maka halo koperasaun no asistensia servisu iha tempu naruk no ba futuru TLPDP nia programa fo prioridade liu ba formasaun”, subliña.
Iha okaziaun ne’e Ministru Interior hateten sei tau kondisaun hodi investe ba PNTL no husu membru sira atu utiliza sasan hirak ne’e ho responsabilidade maximu nune’e bele dura ba tempu naruk.
“Husu ba imi atu kuidadu robot ida ne’e, tanba nia hanesan espasu primeiru ida hodi ajuda servisu imi nia servisu. Tanba ne’e husu mos ba imi atu tuir treinu ida ne’e ho diak, tanba sira lori sira nia matenek hodi fahe, ne’e dunik buka hodi aprende nune’e aban bainrua bele iha rezultadu no uza fasilidade sira ne’ebé sira oferese hodi servi rai no nasaun ida ne’e. Ikus liu husu atu imi servisu ho profisional, disiplina, respeita hierarkia no komandu”, sujere.
Entretantu Komandante Jerál PNTL, Komisáriu Jerál, Henrique da Costa, ekipamentu ne’e sei faslita diak liutan membru EOD sira wainhira halo servisu iha terenu.
“Ohin loron marka tán istoria ida hodi moderniza PNTL ida modernu, liuhusi ekipamentus ho teknolojia modernu ne’ebé oferese husi Governu Austrália.
Ekipamentu ida-ne’e importante tebes iha misaun EOD nian wainhira hasoru situasaun ida ne’ebe risku tebes ho sistema remote control hodi bele hamenus risku ba ekipa EOD iha nia atuasaun wainhira halo hela dezativasaun ba bomba sira no aparellu sira seluk ne’ebé maka ita deskonfia”, esplika Komisáriu Henrique.
Nia dehan, robot EOD ne’e kompletu ho nia sensor, kamara ho liman manipulativu ida ne’ebé bele halo identifikasaun no opera hosi espesialista sira.
“Utilizasaun robot ne’e rasik presija ema ne’ebé treinadu no iha esperiénsia ba iha dezativasaun bomba iha situasaun ne’ebé perigu no presija protokolu seguransa ida forte no iha skill ho tátika no prosedimentu sira relasiona ho bomba nian”, afirma.
Nia hatutan, ho prezensa robot ne’e bele ona utiliza hodi halao misaun sira hanesan investigasaun, identifikasaun, mobilizasaun no destroisaun ba objetu sira ne’ebé deskonfia hodi fó ameasa ba vida umana no propriedade.
“Hau hakarak enkoraja ba imi sira ne’ebé sei partisipa iha treinamentu ba utilizasaun ROBOT EOD ne’e, hahu ohin ba oin imi no ita tenke iha komitmentu hodi dedika ita nia an no tenta atu buka hatene siénsia sira ne’ebé relasiona ho materia importante sira seluk hodi asegura ita nia komunidade sira, saida maka ita-nia maluk sira husi Austrália halo ona, aprende nafatin hosi sira nune’e ita bele halo fali diferensa iha futuru ida ho kualidade no profesionál”, afirma.
Iha oportunidade ida-ne’e lider másimu PNTL ne’e hato’o agradesementu ba Governu Austrália, liuhosi reprezentante Embaixadór Austrália mai Timor-Leste, Caitlen William no-mós Komandante TLPDP, Daaren Booy ho nia ekipa ne’ebé sempre prontu iha kualker tempu hodi fó
apoiu iha dezenvolvimentu PNTL to’o ohin loron.
apoiu iha dezenvolvimentu PNTL to’o ohin loron.
Serimonia entrega robot no abertura primeiru kursu ne’e hetan partisipasaun hosi Prezidente Komisaun B Parlamentu Nasionál (PN), deputadu Domingos Augusto “DEKER, Adjunta Embaixadóra Austrália iha Timor-Leste, Caitlen William, Adidu Seguransa POLRI nian, Superintendente Xefi Polisia, Don Gaspar Mikel da Costa, Komandante TLPDP Superintendente Darren Booy, ofisiais militar EUA nian, Ofisiais F-FDTL, inklui ofisiais superiores, Inspetores, Sarjentu no Ajentes PNTL sira. # (Bui/Oscar/AX).
