Dili, 27 maiu 2024 (SRP) – Servisu Informasaun Polísia Nasionál (SIPN), liu hosi ekipa Araña junta ho FP (Forsa Polísia), asegura joven mane ida ho naran inisiál AMA alias AL tinan 17, hosi Suai, Munisípiu Covalima, hela iha Suku Manleuana, Postu Administrativu Dom Aleixo, Munisípiu Dili ne’ebé envolve krime jerál ba kazu naok motór no telefone iha Kapitál Dili.
Iha prosesu identifikasaun suspeitu AMA deklara katak nia hamutuk ho Ariki Malinamuk maka naok motór rua inklui telefone-6. Motor rua ne’e marka Beat Street kor metan sira naok iha area Bebonuk tasi ibun no fa’an ona iha Maubisse. Motór ida tan marka Beat kor kinur metan sira naok iha area Comoro Aldeia 4 de Setembru iha loron 15 fevereiru 2024 horas 02:00 madrugada. Enkuantu telefone 6 ne’e faan hotu ona ba vendedór sira iha area Merkadu Taibesse ho presu ne’ebé baratu tebes.
Suspeitu AMA mos akresenta tan katak motór ne’ebé nia grupu seluk naok ne’e hamutuk 18, balu tránzitu Dili no Tránzitu Nasionál prende ona tanba komete infrasaun, nune’e sira sei la ba foti motór refere. Enkuantu durante halo asaun nia hamutuk ho grupu rua seluk hosi Squad Domin no Mautebe inklui nia maun alin sira husi Grupo RK (Rabat Kesi).
Suspeitu mós deklara katak motór barak mak sei iha nia maluk nain rua seluk ne’ebé oras ne’e ekipa konjunta buka tuir hela. No sira ne’ebé hetan ona kapturasaun mak hanesan Ogi, Ricky Malinamuk, Rivaldo, Ebi, Manekas, Akon, Asaba no Apeu Xina. Hosi naran hirak ne’e sira komete bebeik ona kazu naok osan, naok telfone no-mós hadau telfone iha dalan públiku ne’ebé mak rejista ona iha PNTL.
Hafoin halo identifikasaun ekipa servisu kontatu kedas ba SIKN (Servisu Investigasaun Kriminál Nasional) hodi mai foti atu kontinua halo prosesu investigasaun antes submete ba tribunál hodi tuir porsesu julgamentu. #SRP
