𝐆𝐔𝐕𝐄𝐑𝐍𝐔 𝐋𝐀𝐍𝐒𝐀 𝐅𝐀𝐓𝐔𝐊 𝐃𝐀𝐇𝐔𝐋𝐔𝐊 𝐁𝐀 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔 𝐍𝐎 𝐄𝐗𝐏𝐀𝐍𝐒𝐀𝐔𝐍 𝐀𝐄𝐑𝐎𝐏𝐎𝐑𝐓𝐔 𝐂𝐎𝐌𝐎𝐑𝐎

𝐃𝐢𝐥𝐢, 𝟐𝟎 𝐦𝐚𝐢𝐮 𝟐𝟎𝟐𝟓 (𝐒𝐑𝐏) – Ministru Interior, Francisco da Costa Guterres, Ph.D, hamutuk ho Sekretariu Estadu Protesaun Sivil, Domingos Mariano Reis, akompaña Primeiru-Ministru (PM), Kay Rala Xanana Gusmão, partisipa serimónia Lansamentu Primeira Pedra ba Dezenvolvimentu no Expansaun Aeroportu Internasional Prezidente Nicolau Lobato Dili.

“Ida ne’e nudar privileiju no ónra boot ida mai hau, hodi simu ita boot sira hotu iha okoziaun Lansamentu primeira-pedra ba Dezenvolvimentu no Expansaun Aeroportu Internasional Prezidente Nicolau Lobato nian. Tanba ne’e hau lori Ministériu Transportes no Komunikasoes nia nia naran, no mos hodi hau nia kolega membru governu iha iha Steering Committee, hato’o ami nia boas vindas no apresiasaun boot ba ita boot sira hotu nia prezensa, iha seremónia importante ida ne’e”, esplika Miguel Manetelu perante nia diskursu iha Aeroportu Comoro.

Tuir nia, nudar Ministériu Responsavel, hamutuk ho membrus sira husi Steering Committee no Tékniku sira ne’ebé involve durante ne’e, tau ona iha kuidadu no rigór tékniku husi projetu ida ne’e no asegura nia aliñamentu ho programa no planu estratéjiku Dezenvolvimentu Nasional nian.

“Seremónia ida ne’e, laos deit inísiu simbóliku ida husi servisu fíziku konaba Dezenvolvimentu no Expansaun Aeroportu nian, maibe mos nudar momentu kulminasaun husi vizaun estratéjiku, planeamentu estratéjiku, koordenasaun institusional, inklui ho sentidu brani iha hola desizaun estratéjiku no desizivu iha prosesu tomak to’o nia finalidade”, salienta.

Nia dehan, hafoin konklui Planu Estratéjiku Dezenvolvimentu Nasional (2011 – 2030), Iha V Governu Konstitusional ho Lideransa Maun Boot Kay Rala Xanana Gusmão nian, fó prioridade kedas ba dezenvolvimentu Aeroportu Internasional Prezidente Nicolau Lobatu, hodi halo planu Mestre ho apoiu IFC nian. Ikus mai, re-vizita fila-fali planu mestre refere no konklui iha tinan 2019, ne’ebé hanaran “Relatoriu Planu Mestre 2019 ba Aeroportu International Prezidente Nicolau Lobato”.

Entretantu, Iha tinan 2021 liuba, ho asistensia tékniku hosi ADB, halo ona estudu viabilidade ida-ne’ebé komprensivu liu, inklui halo revizaun ba planu mestre 2019, prepara dezeñu báziku, finansiamentu, governasaun, no salvaguarda sosiál no ambientál sira. Embora governasaun anterior konsege to’o ba faze ida ba mobilizasaun finanseira no asina kontratu inisial ba konstrusaun nian, obra ida ne’e labele ezekuta tanba kestaun tranzisaun governasaun nian.

“Ohin historia repete hikas fali. Hafoin diskusaun no halo revizaun téknika oin-oin, ho anotasaun espesífiku ba nia komplexidade projetu ida ne’e nian, ho lideransa maun boot Kay Rala Xanana Gusmão, ita hahu ho lansamentu primeira pedra no kompromete atu konklui obra ida ne’e tuir tempu no kalendarizasaun ne’ebe konkorda hamutuk ona”, afirma.

Miguel Manetelu komenta, maske projetu ida ne’e, komplikadu maibe importante duni ba Timor-Leste. Tamba ne’e, nia rekuñese papel importante ne’ebé dezempeña ona husi komponente hotu-hotu, desde inisiu to’o ohin loron.

“Hau hakarak hahu hodi rekoñese papel importante ida husi komisaun téknika ne’ebé halo levantamentu ba propriedade ita nia populasaun nian iha Área Aeroportu ida ne’e, to’o ba nia faze pagamentus. Ida ne’e, importante tamba permite prosesu expansaun Aeroportu nian bele hahu. Hau hakarak rekoñese papel importante husi ekipa téknika sira iha Ministériu Financas, ne’ebé involve iha diskusaun téknikas oin-oin hodi konklui modalidade finansiamentu sira ne’ebe involve iha projetu ida ne’e. Hau hakarak Rekonhese mos desizaun sira ne’ebé foti ona antes IX Governu Konstitusional nia mandatu. Em Especial, hau hakarak rekoñese apoiu inkondisional ne’ebé fó husi hau nia kolega membrus governu ne’ebé halo parte ba Steering Committee nian. Ho ita boot sira nia apoiu, ikus mai, hetan aprovasaun ba dezeñu integradu ida ba implementasaun obra importante ida ne’e husi Sua Exelensia Primeiru Ministru, Maun boot Kay Rala Xanana Gusmão, ne’ebé permite ita hotu halibur iha ne’e hodi fo sasin ba lansamentu ida ne’e “, fundamenta.

Nia hatutan, Serimónia ohin loron, signifika pasu krítiku ida iha fáze implementasaun nian, ne’ebé ezije disiplina, koordenasaun inter-setorial, no kompromisu koletivu ba kualidade, transparénsia, hodi entrega iha tempu loloos husi periúdu implementasaun nian.

“Ha’u fiar katak ho apoiu husi parte-interesada hotu-hotu – no ho orientasaun husi Sua Exelensia Primeiru-Ministru no membrus do governu husi IX Governu Konstitusional nia apoiu – ami sei entrega aeroportu ida ne’e ho padraun ne’ebé ne’ebé Timor-Leste merese, ba jerasaun ohin loron no jerasaun sira tuir mai”, hakotu.

Serimonia ne’e hetan paritisipasaun hosi Primeiru-Vice-Primeiru-Ministru, Ministru Koordenadór Assuntu Ekonómikus no Ministru Turizmu no Ambiente, Dato’ Seri Francisco Kalbuadi Lay, Parseru Dezenvolvimentu sira, Embasadores, Korpus Diplomata ba kooperasaun sira, Setor Privadu no-mos Diretores Jerais no Diretores Nasionais sira. #AX