𝐄𝐊𝐈𝐏𝐀 𝐕𝐄𝐓𝐄𝐑𝐀𝐍𝐔𝐒 𝐍𝐎 𝐉𝐎𝐕𝐄𝐍𝐓𝐔𝐃𝐄 𝐇𝐀𝐒𝐎𝐑𝐔 𝐌𝐈 𝐌𝐎𝐋𝐎𝐊 𝐇𝐀𝐋𝐀’𝐎 𝐌𝐈𝐒𝐀𝐔𝐍 𝐀𝐏𝐑𝐄𝐍𝐃𝐈𝐉𝐀𝐙𝐄𝐌 𝐁𝐀 𝐑𝐔𝐀𝐍𝐃𝐀

𝐄𝐊𝐈𝐏𝐀 𝐕𝐄𝐓𝐄𝐑𝐀𝐍𝐔𝐒 𝐍𝐎 𝐉𝐎𝐕𝐄𝐍𝐓𝐔𝐃𝐄 𝐇𝐀𝐒𝐎𝐑𝐔 𝐌𝐈 𝐌𝐎𝐋𝐎𝐊 𝐇𝐀𝐋𝐀’𝐎 𝐌𝐈𝐒𝐀𝐔𝐍 𝐀𝐏𝐑𝐄𝐍𝐃𝐈𝐉𝐀𝐙𝐄𝐌 𝐁𝐀 𝐑𝐔𝐀𝐍𝐃𝐀

‎Dili, 18 maiu 2026 – Ministru Interiór (MI), Francisco da Costa Guterres, Ph.D, hamutuk ho Sekretariu Jerál Organizasaun g7+, Helder da Costa, hala’o briefing ho delegasaun Timor oan sira ne’ebé sei halo  Misaun Aprendizajem ba Kigali nu’udar Kapitál hosi nasaun Ruanda iha Afrika Durante Semana Ida. 

“‎Misaun ida ne’e organiza ho parseria  Ministériu Interior, tanba ne’e ohin ita halo briefing antes aranka ba Ruanda ho nia objetivu maka atu fahe informasaun por menores halo prepartivu, hatene nia objetivu no outcome saida maka atu alkansa hosi vizita ne’e. Ita iha agreement atu ita bot sira ba fahe experiensia ba malu no ita bele aprende mos ho sira”, esplika Sekretariu Jerál Organizasaun g7+, Helder da Costa, iha sala  Konferensia Dame, edifisiu sentral g7+ Palasiu Guvernu.

Nia dehan, vizita ida ne’e badala tolu ona tanba ‎antes ne’e nia parte lori ona delegasaun timor balu ba iha Ruanda. Tanba durante dekada 30 ona dezenvolvimentu iha Ruanda lao adiantadu tebes, maske menus iha rekursu maibe sira transforma ekonomia sai tiha Singapura iha Afrika.

‎”Ita bo’ot sira to’o iha sidade Kigali iha loron 24, bele nota kedas iha ne’eba zero plastiku tanba ema la barani soe foer arbiru, tanba sira iha tema tolu importante tebes maka hanesan unidade nasional, segundu akuntabilidade tranparensia, terseiru maka hanoin luan hodi hamosu idea foun”, adianta.

‎Helder hatutan, progama ne’e nia parte halo ona kooperasaun diak ho Ruanda, tanba ne’e nia husu atu ba fahe esperiensia tuir portfolio hafoin wainhira fila mai bele fahe tutan ba ita nia sosiedade.

“‎Ita bo’ot sira ne’e selesionadu por meritos, tanba balu hosi PNTL, Parlamentu Nasional, veteranus, lider rezistensia, sosiedade sivil, Jerasaun Patriota, lider Grupu Arte Marsiais, inklui Sivitas Akademikas sira”, dehan tan.

Iha fatin hanesan, Ministru Interiór (MI), Francisco da Costa Guterres, Ph.D, sujere atu ekipa ida ne’e bele identifika mos investimentu no mudansa signifikativu hodi halo transformasaun. Tanba agora daudaun Ruanda sai paiz avansadu tebes iha Áfrika.

“Vizita ida ne’e ba para atu aprende nune’e fila mai bele fahe tutan ba ta nia organizasaun, Guvernu no estadu, nune’e ita bele aprende tuir halo buat diak ba rai ida ne’e”

Antes termina, Ministru Francisco, husu atu delegasaun sira haree kona-ba programa balun ne’ebé relevante tebes mai  nasaun Timor-Leste.

“Boa viajem ba hamutuk servisu hanesan ekipa ida, tenta hatene klean kona-ba ema nia rai. Tanba ne’e, husu ba provedor atu hare saida maka halo hodi dezenvolve ita nia rai. Ba jerasaun patriota mos iha ne’e ita servisu hamutuk lori buat diak mai ita nia rai. Depois de Fila maka ita organiza hodi  hato’o iha reunian  Konsellu ministru”, sujere.

Antes termina, Ministru Interior, kongratula ho idea hirak ne’e no konkorda katak, organizasaun g7+ ne’e relevante liu no iha kbi’it atu dezenvolve nasaun sira ne’ebé afetadu husi konflitu, liuhusi advokasia konjunta, aprende hamutuk no kolabora malu nune’e bele promove paz no estabilidade iha nasaun membru g7+ sira hotu. #Bui