𝖯𝖱𝖤𝖹𝖨𝖣𝖤𝖭𝖳𝖤 𝖱𝖠𝖬𝖮𝖲-𝖧𝖮𝖱𝖳𝖠 𝖲𝖨𝖬𝖴 𝖵𝖨𝖹𝖨𝖳𝖠 𝖮𝖥𝖨𝖲𝖨𝐀𝖫 𝖣𝖠𝖧𝖴𝖫𝖴𝖪 𝖧𝖴𝖲𝖨 𝖬𝖨𝖭𝖨𝖲𝖳𝖱𝖴 𝖠𝖴𝖲𝖳𝖱𝖠𝖫𝖨𝖠𝖭𝖴 𝖧𝖮𝖭 𝖳𝖮𝖭𝖸 𝖡𝖴𝖱𝖪𝖤 𝖬𝖯 𝖬𝖠𝖨 𝖳𝖨𝖬𝖮𝖱-𝖫𝖤𝖲𝖳𝖤

Dili, 28 janeiru 2025 (SRP) – Prezidente no Laureadu Nobel ba Pás, J. Ramos-Horta, simu Honorável Tony Burke MP iha ninia vizita ofisiál dahuluk mai Timor-Leste.

Ministru Burke asumi knaar nu’udar Ministru ba Asuntu Internu, Ministru ba Imigrasaun no Asuntu Multikulturál, Ministru ba Seguransa Sibernétika, Ministru ba Arte, no Líder ba Kámara iha Parlamentu Australianu nian ba dala 47.

Iha sira-nia enkontru iha Palásiu Prezidensiál Nicolau Lobato, líder sira hala’o diskusaun substantiva kona-ba hametin amizade ne’ebé kleur ona entre Timor-Leste no Austrália, foka liu ba mobilidade traballadór, jestaun fronteira, siberseguransa, no kooperasaun kulturál.

Enkontru ne’e ko’alia kona-ba área xave sira kona-ba hasa’e Programa Mobilidade Traballadór Pasífiku Austrália nian (PALM), espansaun oportunidade ba servisu temporáriu no dalan edukasionál liuhusi bolsa estudu no formasaun profisionál, hametin mekanizmu monitorizasaun kondisaun servisu ba traballadór Timor-oan sira iha Austrália, no inisiativa interkámbiu kulturál ne’ebé planeia atu selebra Timor-Leste nia integrasaun ASEAN durante tinan 2025.

Prezidente Ramos-Horta subliña papél importante husi remisaun sira husi traballadór Timor-oan sira iha Austrália hodi apoia família sira no kontribui ba dezenvolvimentu nasionál, hodi husu espansaun husi programa sira ne’ebé eziste ona ho aumentu oportunidade ba kolokasaun nian.

“Austrália hatudu konsistente nu’udar parseiru ida-ne’ebé metin iha Timor-Leste nia viajen ba dezenvolvimentu no prosperidade. Espansaun husi programa mobilidade traballadór nian no hametin ligasaun kulturál sira sei aprofunda liután ligasaun entre ita-nia nasaun, hodi fó benefísiu ba ita-nia povu rua ne’e. Ami hakarak kontinua harii oportunidade sira-ne’e, partikularmente bainhira Timor-Leste tama iha kapítulu foun ida ho nia adezaun ba ASEAN,” afirma Prezidente Ramos-Horta.

Governu australianu reafirma nia kompromisu hodi proteje direitu sira traballadór nian, ho mekanizmu sira ne’ebé di’ak liu atu monitoriza kondisaun serbisu nian no asegura “kondisaun sira ne’ebé hanesan ba serbisu sira ne’ebé hanesan” ba traballadór Timor-oan sira iha Austrália. Ministru Burke subliña kompromisu Austrália nian ba relasaun bilaterál, hodi destaka lasu amizade ne’ebé kle’an entre nasaun rua ne’e no sira-nia vizaun hamutuk ba estabilidade no prosperidade rejionál.

Enkontru ne’e hetan partisipasaun husi ofisiál prinsipál sira husi nasaun rua, inklui Ministru Negósiu Estranjeiru no Kooperasaun Timor-Leste, S.E. Sr. Bendito dos Santos Freitas, Ministru Interior, S.E. Sr. Francisco Guterres, Embaixadór Austrália nian iha Timor-Leste, S.E. Sra. Caitlin Wilson, no reprezentante distintu sira seluk. #Ester