Dili, 24 abil 2024 (SRP) – Komandante ba Programa Dezenvolvimentu Polísia Timor-Leste (sigla Inglés;TLPDP), Superintendente Darren Booy, iha kuarta kalan ne’e, halo despedida ho Ministériu Interior hamutuk ho estrutura Komandu Jerál Polísia Nasionál Timór-Leste (PNTL) tanba remata ona nia misaun durante tinan 4 iha Timór-Leste.
Iha biban ne’e Darren Booy espresa nia sentimentu kontente bele servisu hamutuk ho Ministério do Interior tanba konsege halo enkuadramentu foun hodi formaliza akordu entre Polísia Federál Austrália ho PNTL liliu iha área kooperasaun polisiál ne’ebé mak foka ba treinamentu nu’udar oportunidade importante ba dezenvolvimentu profesionalismu PNTL hodi atua krimi organizadu sira.
Entretantu, Ministru Interior Francisco da Costa Guterres, hato’o agradesimentu ba Komandante Darren nia servisu todan no kontribuisaun folin bo’ot ba misaun ne’ebe halo durante tinan hat nia laran hodi apoia Ministeriu Interior, liu hosi dezeña planu estratéjiku hodi dezenvolve servisu migrasaun liu-liu oinsa haforsa jestaun fronteira ida ne’ebé di’ak iha postu fronterisa terriotóriu timor laran tomak.
Governante ne’e mós agradese ba Governu Austrália liuhosi Embaixadora Austrália iha Timor-Leste Caitlin Wilson, liuliu ba Polísia Federál Austrália sira, tanba sira maka harii Sentru Formasaun Polisia Comoro, instala fatin ba VPU, Robot esplozaun, Mata-dalan Seguransa Rodaviaria, fó treinamentu ba polísia no-mós fasilita formasaun sira iha área lideransa, investigasaun kriminál, Intelijénsia no-mós área tékniku balun ne’ebé ligadu ho krime organizadu sira.
Iha serimónia despedida ne’e Komandu Jeral PNTL liu hosi Komandante Komandu Operasaun, Superintendente Xefi Polísia, José Soares, entrega mós lembransa hanesan, uma adat, xapeo PNTL no tara mós tais hanesan simbolu agradesimentu no apresiasaun durante nia servisu nu’udar parseiru permanente ba instituisaun PNTL. #SRP
