Dili, 21 marsu 2024 (SRP) – Formandus nain 20 hosi Diresaun Jerál Servisu Migrasaun, konklui ona formasaun ne’ebé fasilita hosi Home Affairs Austrália hodi fornese formasaun kona-ba risk management no passengers assessment ba ofisiál no ajente hosi Diresaun Jerál Servisu Migrasaun (DGSM) hodi haforsa jestaun fronteira ida ne’ebé di’ak iha postu fronterisa territóriu nasionál tomak.
Xefe setór Fronteira Inspetór Polísia Agostinho da Costa, hateten objetivu hosi formasaun ne’e atu kapasita ajente no ofisiál Migrasaun sira oinsá halo atendementu di’ak iha postu fronteira sira.
“Ohin ita konklui ona formasaun ne’ebé fasilita hosi Guvernu Austrália ba membru Migrasaun tantu hosi PNTL no Sivíl sira ne’ebé destakadu iha Postu Integradu Fronteira hotu. Ba tinan ida-ne’e ita hahu ho ema na’in 18 kompostu hosi feto nain 5 no mane nain 13 hodi eleva tán sira-nia kapasidade iha area jestaun risku no oinsá halo avaliasaun ba pasajeiru sira ne’ebé halo movimentu iha pontu entrada sira”, Informa Agostinho da Costa, hafoin ensera formasaun ne’e iha Sentru Formasaun Polísia Comoro (CFP), kinta-feira.
Nia dehan, kursu ne’e fó kompentensia liubá ofisiál migrasaun sira oinsá halo jestaun operasionál liu-liu lei sira liga ba atendementu públiku nian wainhira halo atuasaun iha terenu.
“Ho formasaun ne’e garante teb-tebes ba ami nain hira ne’ebé nudar ajente migrasaun ninian iha fronteira ne’eba tanba siénsia ida ne’e ligadu kedas ho ami-nia servisu lor-loron entaun bele mós loke nafatin ami-nia hanoin para ami bele halo atendimentu iha fronteira ho diak” tenik nia.
Tuir Agostinho, importansia hosi formasaun ne’e hodi eleva kapasidade membru Migrasaun tantu hosi PNTL no Sivíl nian nune’e bele halo ezaminasaun ba dokumentu no fraude iha postu fronteira tomak.
“Formasaun ne’e importante tebes tanba dalabarak ema tama ho dokumentus ilegál oinsá servisu migrasaun atu detekta falsifikasaun dokumentus depois ema halo sabotajem ruma oinsá Servisu Migrasaun bele detekta ho ekipamentus sira ne’ebé mak iha”, fundamenta.
Entretantu formasaun ida-ne’e ho sertifikadu internasionál no sai nudar parte ida hosi programa preparativu hodi prepara rekursu umanu ne’ebé kualifikadu no kontrola sistema foun ne’ebé instala ona iha pontu entrada Timor-Leste hanesan Sakato, Batugade, Suai no Dili rasik.
”Ami mós husu ba Servisu Migrasaun Australia fó kursu bebeik ba ami para ba oin ne’e ami bele intende di’ak liu tán prosesu servisu Border ninian ne’e tanba servisu Border ninian ne’e todan teb-tebes difisil ita hasoru ema matenek klase ida makas nian de’it ne’ebé ida ne’e mak ami persija estuda barak bele detekta para rezolve ida-ne’e” Nia fundamenta.
Iha fatin hanesan, Mr. Paul Young, nudar Primeiru Sekretariu Embaixada Austrália mai Timor-Leste hateten, formasaun ne’e nia objetivu maka atu hasa’e membru sivíl no PNTL sira-nia kapasidade hodi deteta dokumentus falsu no fraude iha postu fronteira tomak.
“Ami fó iha treinamentu durante loron tolu , iha ne’ebé ami iha peritu sira ne’ebé mai husi Austrália atu fahe koñesimentu balun kona-ba oinsa atu haforsa Migrasaun nia jestaun fronteira. Durante loron tolu nia laran ami haree liu ba oinsá halo jestaun risku no avaliasaun ba pasajeiru sira, ezaminasaun dokumentus, halo komparasaun ba imajen sira no buat barak seluk tán ne’ebé kabe ba ofisiál migrasaun sira-nia servisu”, dehan Primeiru Sekretariu ne’e.
Paul Young, hatutan nia parte sei kontinua halo kooperasaun di’ak ho Ministériu Interior liuhosi Servisu Migrasaun hodi fó treinamentu barak liu tán, maibé nia la iha data fixu no konforme desijaun hosi dirijente másimu Servisu Migrasaun no Ministériu rasik. # (Oser/Rival/Charly).
