MI SIMU VIZITA KORTEZIA EMBAIXADÓR MALÁZIA AMARJIT SARJIT SINGH

Dili, 14 marsu 2024 (SRP) – Embaixadór Malázia iha Timor-Leste H.E. Amarjit Sarjit Singh, hala’o vizita kortezia ida mai Ministériu Interior iha Vila-Verde, hodi hasoru malu ho Ministru Interior hodi koalia kona-ba polítika Ministériu Interior nian, liga ba asuntu seguransa nian nune’e bele haforsa kooperasaun bilaterál entre nasaun Timor-Leste no Malázia sai diak liután.

Hafoin enkontru remata embaixadór Malázia hatete katak, enkontru ida-ne’e, atu haree hamutuk area potensiál saida mak sira bele ajuda nune’e bele kontribui ba estabilidade iha Timor-Leste.

“Ohin ha’u mai hasoru Ministru Interior nu’udar parte ida hodi kumprimenta malu tanba ha’u seidauk hasoru nia dezde nia simu kargu. Maibé importante hosi vizita ida-ne’e maka atu haree hamutuk kooperasaun potensiál sira entre Malázia no Timor-Leste iha área operasaun nian” dehan Amarjit Sarjit, iha Ministériu Interior Vila-Verde, kinta (14/03/2024).

Nia hateten, enkontru ne’e atu rona mós informasaun balu husi Ministru Interior kona-ba polítika estadu Timor-Leste ninian ne’ebé foka liu ba área potensiál seguransa liu-liu ba area PNTL no Servisu Migrasaun nian.

“Ami mós koalia kona-ba formasaun no kapasitasaun ba ofisiais fronteira nian no Migrasaun ne’ebé tau matan ba kontrolu area fronterisa. Entaun Ministru mós hato’o ninia hanoin atu imigrasaun no Polisia Timor-Leste bele aprende husi esperiénsia Malázia nian”, subliña.

Kestiona kona-ba kooperasaun ho PNTL iha area kapasitasaun rekursu umanu, diplomata ne’e hateten sei tau iha konsiderasaun hodi inísia fali formasaun.

“Ita hotu rekunese katak PNTL nu’udar komponente prinsipál ida wainhira ita ko’alia kona-ba seguransa ita labele halai ses husi papel PNTL. Agora relasaun entre PNTL no polísia Malázia iha tinan hira ba kotuk mós lao diak loos iha momentu ne’eba. Ha’u hanoin ofisiais PNTL barak iha Timor-Leste hetan ona formasaun iha Malázia no agora ami mós haree diskusaun balun kona-ba oinsá atu hahú halo fali treinamentu nune’e bele haruka ofisiál sira husi ne’e, no haruka treinadór sira husi Malázia atu mai Timor-Leste hodi treinu Polísia Timor-Leste”, afirma.

Hatan ba ida-ne’e Ministru Interior, Francisco da Costa Guterres, Ph,D, apresia ho vizita ida-ne’e no konsidera Malázia hanesan rai ida bo’ot iha rejiaun Azia no-mós nasaun ida ne’ebé desde 1999 fó apoiu mai Timor-Leste makas tanba sira hola parte iha UNPOL (UN Police) no sira mós nasaun ida ne’ebé, kuandu fó apoiu ba Timor-Leste nunka iha hanoin ida atu hetan benefisiu husi ita. # (Bui/Rival/Charl/AX).