DILI, 01 setembru 2023 (SRP) – Ministru Interior, Francisco da Costa Gueterres, Ph.D, simu vizita kortezia hosi Kordenadór Rezidente ONU iha Timor-Leste, Funmi Balogun, diskute kona-ba servisu hamutuk ho Ministériu Interiór nune’e bele ajuda Guvernu Timór-Leste servisu makas hodi halo prevensaun ba krime tráfiku Umanu no reforsa jestaun fronteira.
“Objetivu hosi enkontru ne’e atu kongratula ministru ba kargu foun no ami koalia mós kona-ba parseria servisu entre Nasoens Unidas ho Ministériu Interior ligadu ba asuntu balu ne’ebé ami halo ona iha area jestaun fronteira nian no oinsá atu haforsa fronteira Timor-Leste nian ne’ebé hetan apoiu hosi UN espesialmente hosi IOM ne’ebé durante ne’e servisu barak ona ho Ministériu Interior”, esplika Xefi Rezidente UN Funmi Balogun, hafoin remata enkontru ne’e iha Ministériu Interior, Vila-Verde, sesta ne’e.
Nia dehan, UN mai ho misaun prinsipál atu kontribui ba paz no seguransa globál, direitus umanus no dezenvolvimentu hodi halo mundu ida ne’ebé seguru kontra krime tráfiku droga husi autór rede krime organizadu sira.
“Ita hatene katak Ministériu Interior nudar instituisaun prinsipál hodi asegura seguransa no protesaun públiku iha Timor-Leste entaun ohin ami mós koalia kona-ba asuntu Feto, Paz no seguransa ne’ebe hetan apoiu hosi UN Woman oinsa atu ajuda ajuda Guvernu halo esforsu hodi hapara violénsia hasoru feto no labarik feto sira”, salienta.
Tuir Bologun, nia parte mós kontinua fó apoiu ba Autoridade Protesaun Sivíl kona-ba Sistema Alerta Sedu ba iha fatin risku dezastre nasturais hodi oinsá toma atensaun ba problema dezastre naturál nian iha Timor-Leste.
Ministru Interior, Francisco da Costa Gueterres, kaer liman ho Kordenadór Rezidente ONU iha Timor-Leste, Funmi Balogun
“Ami mós ko’alia kona-ba asuntu sira ne’ebé iha relasaun ho oinsá Nasoins Unidas liu-liu Komisaun Alta Nasoens Unidas nian ba Refujiadu (UNHCR;sigla ingles) bele tama iha ne’e hodi apoia governu kona-ba protesaun nian”, subliña.
Tuir nia, UNHCR nu’udar organizasaun globál ida ne’ebé dedikadu atu salva moris no proteje direitu komunidade sira ne’ebé dezlokadu ho forsa.
Hatan ba ida-ne’e, Ministru Interior, Francisco Guterres, kongratula inisiativa diak hosi Nasoens Unidas hamutuk ho nia ajénsia no parseria sira ne’ebé ho boa vontade ajuda nafatin Timor-Leste.
“Onradu tebes hau lori Guvernu Timor-Leste nia naran hakarak hato’o agradesementu wain ba reprezentante ONU ho nia ajénsia tomak ne’ebé iha inisiativa diak ba seguransa interna liu-liu haforsa seguransa iha fronteira, abordajen seguransa umana iha kontestu prevensaun hodi hapara violénsia hasoru feto no labarik feto sira iha Timor-Leste”, hakotu. # (Bui, Fatinha, AX).
