𝐌𝐈 𝐎𝐁𝐒𝐄𝐑𝐕𝐀 𝐅𝐀𝐓𝐈𝐍 𝐀𝐓𝐄𝐍𝐃𝐈𝐌𝐄𝐍𝐓𝐔 𝐌𝐈𝐆𝐑𝐀𝐒𝐀𝐔𝐍 𝐈𝐇𝐀 𝐏𝐎𝐒𝐓𝐔 𝐌𝐈𝐆𝐑𝐀𝐒𝐀𝐔𝐍 𝐀𝐄𝐑𝐎𝐏𝐎𝐑𝐓𝐔 𝐈𝐍𝐓𝐄𝐑𝐍𝐀𝐒𝐈𝐎𝐍𝐀́𝐋 𝐏𝐑𝐄𝐙𝐈𝐃𝐄𝐍𝐓𝐄 𝐍𝐈𝐂𝐎𝐋𝐀𝐔 𝐋𝐎𝐁𝐀𝐓𝐎

Dili, 08 maiu 2024 (SRP) – Ministru Interior, Francisco da Costa Guterres, Ph.D, akompaña hosi Adjuntu Diretora Jerál Servisu Migrasaun, Juvinal Castelho, hala’o vizita kortezia ida ba Postu Integradu 001 Servisu Migrasaun, hodi observa direta balkaun atendimentu servisu migrasaun nian iha Aeroportu Internasionál Prezidenti Nicolau Lobato.

Biban ne’e Ministru Interior nota katak balkaun atendimentu ho MIDAS (Migration Information and Data Analysis System), ne’ebé oras ne’e daudaun eziste hamutuk 10 kompostu hosi balkaun entrada 6 no saida 4 de’it, nune’e nia husu atu rezolve ida-ne’e lalais hodi aumenta tán rua hodi halo monitorizasaun eletronikamente ba pasajeiru sira ne’ebé tama no sai liuhusi aeroportu.

Hafoin halo observasaun governante ne’e konsidera katak fatin ne’e ladun sufisiente hodi atende ema barak, nune’e nia husu tékniku migrasaun sira atu instala tán balkaun rua hodi bele rezolve lakunas ne’ebé membru Servisu Migrasaun sira hasoru.

Iha okajiaun ne’e Ministru Francisco, hateten katak atu fasilita diak liután membru sira halo servisu ho lalais presija hadia infraestrura hodi loke tán balkaun banku nian iha Postu Fronteira Migrasaun 001, iha Aeroportu Internasionál Prezidente Nicolau Lobato laran, nune’e karik pasajeiru sira bele selu direta iha banku refere hodi la prejudika forma ida-ne’ebé naruk. #SRP