𝐌𝐈 𝐇𝐎 𝐋𝐈𝐍̃𝐀𝐒 𝐌𝐈𝐍𝐈𝐒𝐓𝐄𝐑𝐈𝐀𝐈𝐒 𝐇𝐀𝐇𝐔́ 𝐇𝐀𝐋𝐀’𝐎 𝐖𝐎𝐑𝐊𝐒𝐇𝐎𝐏 𝐋𝐄𝐈 𝐊𝐎́𝐃𝐈𝐆𝐔 𝐄𝐒𝐓𝐑𝐀𝐃𝐀 𝐍𝐎 𝐒𝐈𝐍𝐀𝐈𝐒 𝐓𝐑𝐀́𝐍𝐙𝐈𝐓𝐔 𝐁𝐀 𝐄𝐒𝐓𝐔𝐃𝐀𝐍𝐓𝐄 𝐒𝐈𝐑𝐀

DÍLI- 9 Maiu 2024 (SRP)- Ministériu Interior liuhosi Diresaun Nasionál Seguransa Rodaviária realiza worksop ba estudante sekundariu atravez hosi parte tránzitu, Autoridade Munisípiu Dili hamutuk ho Uniaun Europea hodi habelar informasaun kona-ba Lei Kódigu estrada no Sinais Tránzitu, iha aula Universidade Katólika Timorense (UCT).

Iha biban ne’e, Diretora Nasionál Seguransa Rodoviária, Domingas Maia Barros informa objetivu husi workshop ne’e atu habelar informasaun ba estudante sekundariu sira kona-ba Lei kódigu Estrada.

“Ohin hosi Diresaun Nasionál Seguransa Rodoviária, hamutuk ho asesór sira ami hahú halo workshop ida ba estudante sira, ida-ne’e Ministériu Interior servisu hamutuk ho Autoridade Munisípiu Dili, Polísia Nasionál Tránzitu no Uniaun Europeia, ami hamutuk halo workshop ba estudante sira hodi habelar informasaun kona-ba lei kona-ba Kódigu estrada. Lei ida-ne’e tuir kondisaun iha Timor-Leste nian” informa diretora nasionál seguransa rodaviária, Domingas Maia Barros, ba Servisu Relasaun Públika Ministériu Interior iha UCT kinta- feira ne’e (9/05/2024).

Iha fatin hanesan, Prezidente Autoridade Munisípiu Dili, Gregório Saldanha haktuir katak komunidade Dili , presija reordena fali atu organiza nafatin ba ema ne’ebé maka lori karreta no motór, lao ain sira atu kumpri regras transporte atu evita dezastre sira, hodi ema halo movimentasaun bele fasíl.

“Agora ita iha Dili laran ne’e komplexu loos, difisíl lahalimar atu halo movimentu ba mai ou desloka ba mai,tanba engarafamentu implika husi sé, implika husi ema ne’ebé la respeita ona regras tránzitu nian, ema la rona malu, dezobedénsia, informa PAM Dili.

Autoridade Munisípiu Dili ne’e mós haktuir tán, iha ita-nia estrada públiku sira kuaze ema la respeita sinais tránzitu sira, exemplu hanesan fan sasán iha dalan ninin, ema lao la respeitu ona sinais tránzitu, komunidade barak maka seidauk uza ho loloos sinais tránzitu sira. Ida-ne’e hamosu asidente ou dezastre, Iha estudante barak mós seidauk komprende loloos oinsá atu utiliza sinais tránzitu sira. Ho ida-ne’e mak ita kria workshop ida-ne’e hodi espalla informasaun oinsá atu atualiza sinais tránzitu ho di’ak, salienta PAM Dili.

“Ida-ne’e hanesan edukasaun ida, ba ita-nia populasaun hotu-hotu liu-liu ba estudante sira. Munisípiu Dili tenta atu organiza nafatin no halo servisu hamutuk ho polísia liu-liu ho polísia tránzitu, autoridade lokais, diretór eskola sira, hodi bele habelar nafatin informasaun iha fatin hotu-hotu”, PAM Dili hatutan.

Entretantu PAM Dili hatete tán katak, Munisípiu Dili dezorganizadu, agora atu organiza, ami koopera ho polísia tránzitu, autoridade lokál sira, komunidade sira, laos iha eskola de’it maibé iha suku sira, aldeia sira no mós koopera ho apoiante sira hanesan Uniaun Sidades Kapitais Lingua Portugeza; (sigla portugés;UCCLA).

Ikusliu PAM Dili mós husu ba komunidade ne’ebé fan sasán iha dalan ninin iha Dili laran tenke fila ba fa’an iha Mercado Manleu, Taibesi no Becora. Fatin fan sasán iha merkadu laos iha estrada públiku. Agora dadaun sei prepara lai kondisaun sira, fatin sira ne’e prontu hotu ona sei la fó ona oportunidade atu ema fan sasán iha dalan ninin, konklui PAM Dili. Ekipa SRP.