𝐌𝐄𝐌𝐁𝐑𝐔 𝐏𝐍𝐓𝐋 𝐊𝐎𝐌𝐀𝐍𝐃𝐔 𝐌𝐔𝐍𝐈𝐒𝐈́𝐏𝐈𝐔 𝐃𝐈𝐋𝐈 𝐇𝐀𝐌𝐔𝐓𝐔𝐊 𝟒𝟎𝟗 𝐇𝐄𝐓𝐀𝐍 𝐏𝐑𝐎𝐌𝐎𝐒𝐀𝐔𝐍 𝐃𝐄𝐕𝐈𝐙𝐀 𝐓𝐑𝐀𝐍𝐙𝐈𝐓𝐎𝐑𝐈𝐔

𝐃𝐢𝐥𝐢, 26 𝐦𝐚𝐢𝐮 𝟐𝟎𝟐𝟓 (𝐒𝐑𝐏) — Komandu Polisia Nasional Timor-Leste (PNTL), realiza serimonia Empozisaun Deviza Promosaun Tranzitoriu no Promosaun Por Antiguidade, ba membru Komandu PNTL Munisipiu Díli, Hamutuk 409, iha Sentru Konvensaun Dili (CCD-Sigla Portugés), Segunda-feira ne’e.

𝐌𝐢𝐧𝐢𝐬𝐭𝐫𝐮 𝐈𝐧𝐭𝐞𝐫𝐢𝐨𝐫, (𝐌𝐈), 𝐅𝐫𝐚𝐧𝐜𝐢𝐬𝐜𝐨 𝐝𝐚 𝐂𝐨𝐬𝐭𝐚 𝐆𝐮𝐭𝐞𝐫𝐫𝐞𝐬,𝐏𝐡.𝐃, iha nia diskursu kongratula Komandu Jeral PNTL ho estrutura tomak, inklui membru sira ne’ebé simu hetan promosaun.

“Apresia tebes ba ita bo’ot sira ne’ebe halo servisu importante tebes iha paíz ida ne’e, tanba imi tau imi nia vida iha risku, durante tinan-25, dezempeña nia papel importante iha paíz ida ne’e hodi asegura estadu halo dezenvolvimentu iha paiz ida ne’e”, esplika Ministru Interior, Francisco da Costa Guterres, Ph.D, perante ninia diskursu hafoin serimonia Empozisaun Deviza ba Membru PNTL Komandu Munisípiu Dili (26/05/2025).

Nia dehan, Governu ho estadu iha obrigasaun tomak hodi fó onra ba servisu sira ne’ebé instituisaun PNTL halo.

“Iha situasaun defisil, ne’ebé imi hakat liu ona, apresia tanba imi servisu tau importânsia aas liu imi nian an hodi defende estadu no nasaun ida ne’e. Tan ne’e imi merese simu promosaun ida ne’e”, dehan tan.

Governante ne’e husu ba Komandu atu kria nafatin kondisoens hodi halo kontinuasaun ba formasaun ba membru sira ne’ebé mak promovidu ona nune’e iha nafatin iha kapasidade hodi lidera Institutuisaun PNTL.

Ezekutivu ne’e nafatin ezizi servisu PNTL nian, hodi servi povu no nasaun ida ne’e ho di’ak liutan ho papél ne’ebé rigor no disiplina, tanba Governu sei la tolera Membru ida deit viola regra Disiplina iha PNTL nian.

MI husu ba sira ne’ebé mak promovidu ona, atu kontinua hala’o servisu ho displina no respeita nafatin hirarkia ne’ebé mak iha komandu, tanba sei halo mós Re-Estruturasaun ba PNTL.

Governante ne’e mós parabéniza ba komisaun no komandu PNTL nian, ne’ebé disponível halo dadus no la’o tama sai munisipiu hodi ronapreokupasaun sira ne’ebé mak durante ne’e PNTL sira hasoru.

“Hakarak agradese mos ba Komandu jeral PNTL, ne’ebé halo kooperasaun di’ak tebes ho Komisaun Promosoens Tranzitória, hodi bele aprezenta dadus sira to ikus mai realiza duni planu ida ne’e iha aniversáriu PNTL nian foin dadauk ne’e”, subliña.

Entretantu, serimónia impozisaun diviza tranzitoriu ne’e, halo bazeia ba dekretu lei numeru 35/2024 loron 18 fulan Outubru, tuir artigu 155, iha Alinea 1 to’o 9 no bazeia ba despaixu Ministru Interior numeru 14/G/MI, fulan Fevereiro tinan 2025 hodi inisia promosaun tranzitoriu ba membru PNTL balun iha Palasiu Governu loron 27 fulan Marsu tinan 2025, iha ambitu komemorasaun loron ezistensia PNTL ba dala XXV.

Nune’e mos hala’o impozisaun diviza antigidade ba membru PNTL, bazeia ba dekretu lei numeru 35/2024 loron 18 fulan Outubru, tuir artigu 75, iha Alinea 1 to’o 2 promosaun por atiguidade no depaixu komandu Jerál PNTL numeru 229/CG-PNTL/ fulan Abril tinan 2025. #Bui