𝐀𝐉𝐄́𝐍𝐒𝐈𝐀 𝐓𝐈𝐂 𝐓𝐈𝐌𝐎𝐑 𝐈.𝐏 𝐒𝐄𝐈 𝐌𝐎𝐃𝐄𝐑𝐍𝐈𝐙𝐀 𝐒𝐄𝐑𝐕𝐈𝐒𝐔 𝐎𝐏𝐄𝐑𝐀𝐒𝐈𝐎𝐍𝐀𝐋 𝐌𝐈𝐍𝐈𝐒𝐓𝐄𝐑𝐈𝐔 𝐈𝐍𝐓𝐄𝐑𝐈𝐎𝐑

DÍLI, 13 Maiu 2026 – Tekníku Ajénsia TIC TIMOR I.P., liuhusi Diresaun Sentru Dadus (DSD), Diresaun Dezenvolvimentu Sistema, Teknolojia no Inovasaun (DDSTI) no Diresaun Servisu Infraestrutura (DSIR), realiza enkontru koordenasaun servisu ho ekipa tékniku husi Ministériu Interior (MI), iha salaun enkontru TIC TIMOR Kaikoli.          

Objetivu prinsipál husi sorumutu ne’e  hodi diskute kona-ba atualizasaun servisu dijitál iha MI, ne’ebé foka liuliu ba kestaun estratéjika sira hanesan modernizasaun komunikasaun institusionál, fortalesimentu identidade dijitál no domíniu, jestaun dokumentu dijitál ne’ebé seguru, no dezenvolvimentu aplikasaun ba Jestaun Rekursu Umanu no Lojístika. Inisiativa sira-ne’e atu dudu transformasaun servisu ne’ebé efetivu no hasa’e kualidade efisiénsia administrativa iha MI.

Iha reuniaun ne’e, Asesór IT husi Ministériu Interior, Sr. Ladislau Saldanha, aprezenta katak MI presiza asisténsia téknika husi Ajénsia TIC TIMOR hodi responde ba nesesidade dijitalizasaun. Apoiu ne’e sei fasilita funsionáriu sira hodi moderniza sira-nia servisu iha parte IT, Média, no Rekursu Umanu, inklui implementasaun sistema arkivu dadus no  halo jestaun ba  karta tama-sai. Iha biban ne’e, MI mós husu TIC TIMOR hodi fornese kapasitasaun ba jerente sira ne’ebé sei utiliza plataforma foun hirak ne’e.

Ministériu Interior mós iha esperansa bo’ot ba kolaborasaun ne’ebé di’ak ho TIC TIMOR hodi fó solusaun ba dezafiu dijitál sira ne’ebé atualmente ministériu infrenta.             

Hatan ba kestaun ne’e, Diretór Diresaun Sentru Dadus (DSD) TIC TIMOR, Sr. Rusmin Vicente Fatima, informa katak papél prinsipál ne’ebé IX Governu Konstituisionál atribui ba Ministériu Transporte no Komunikasaun (MTK) liuhusi TIC TIMOR mak atu promove no implementa Governu Eletróniku (e-Government) iha instituisaun Estadu hotu inklui Ministériu Interior.       

“ Ho papél prinsipál ne’ebé atribui, TIC TIMOR prontu fó apoiu tékniku ba MI. Tanba ne’e, parte tékniku sei dezenvolve topolojia ba baze de dadus (database) hotu no prepara infraestrutura ne’ebé nesesáriu. Ami mós sei hala’o asesmentu ba sistema Rekursu Umanu no Lojístika hodi sai baze ba dezenvolvimentu aplikasaun foun. Enkuantu iha parte média, ami sei redezeñu no atualiza website ofisiál MI nian atu sai modernu no seguru liu,”.

Entretanu iha enkontru ne’e TIC TIMOR partisipa mós husi Diretór Diresaun Servisu Infraestrutura (DSIR), Sr. Henrique Fulgêncio Guterres, Xefi Departametu Operasional Sentru Dadus, Sr. Francisco S. do R. Ximenes, Koordenador Inteligência Artificial e Inovação, Desenvolvimento de Sistema, Tecnologia e Inovação (DDSTI), Sr. Norberto Soares Cristovão, ho ekipa. Entretantu MI kompostu husi, Sr. Librato Paicheco, Sra. Josefina Baquita Codsta Belo, Sr. Pedro da costa Morais,  ho ekipa.